Talentos Inclusivos amosa na OSHWDem o potencial da tecnoloxía aberta para as persoas con discapacidade

A Domus acolleu este sábado 4 de outubro unha nova edición da OSHWDem, a feira de robótica e tecnoloxías abertas que cada ano organiza a asociación BricoLabs co obxectivo de achegar a innovación ao público familiar. Na súa sexta edición, o evento reuniu máis de 150 proxectos procedentes de España e varios puntos de Europa, incluíndo demostracións, competicións de robots, conferencias e unha ducia de obradoiros que se estenderán ata o mes de decembro.
Entre as iniciativas destacadas, o proxecto Talentos Inclusivos, impulsado polo Centro de Investigación en Tecnoloxías da Información e das Comunicacións (CITIC) da Universidade da Coruña, volveu ter unha presenza relevante mostrando varios dos seus retos desenvolvidos en edicións anteriores. No espazo expositivo puidéronse ver un taboleiro de pictogramas e unicornios realizados en impresión 3D, que foron, segundo salientou o CITIC, “exemplos de como a tecnoloxía aberta pode mellorar a comunicación e a autonomía das persoas con discapacidade”.
O centro tamén informou que o seu persoal investigador presentou diversas experiencias tecnolóxicas centradas na accesibilidade e na inclusión. Entre elas, xogos de adestramento cognitivo mediante Realidade Virtual, presentados por Iago Fernández; unha demostración de Switch Mario Kart, cunha adaptación do mando para o seu control a través do tronco ou da cabeza, desenvolvida por Paula Santos; e Compra con-migo, un xogo personalizado deseñado por Jorge Rivadulla para fomentar a autonomía en tarefas cotiás. Tamén se realizou unha demostración de pintura con un produto de apoio de cabeza, que puxo de relevo o potencial da tecnoloxía inclusiva aplicada á arte.
“O OSHWDem é un exemplo de como a tecnoloxía pode ser accesible, creativa e transformadora. Iniciativas como Talentos Inclusivos amosan que a innovación aberta pode ter un impacto real na vida das persoas”, destacou Irene Brage, responsable de proxectos de Talentos Inclusivos.
Pola súa banda, Paula Santos-Dorrego subliñou que “a adaptación de mandos ou ferramentas de xogo abre un novo horizonte de participación e lecer inclusivo, permitindo que todas as persoas poidan gozar da tecnoloxía en igualdade de condicións”.