Soutomaior acolle unha xornada para converter o turismo de Pontevedra en referente innovador

Este mércores celébrase no Castelo de Soutomaior un encontro directamente encamiñado a afianzar o traballo conxunto das administracións e das empresas arredor do turismo e os xeitos de facelo máis rendíbel, sustentábel, integral e participativo. Estamos a falar da primeira xornada TurisTIC da Deputación de Pontevedra, que se desenvolve baixo o lema Impacto das novas tecnoloxías no sector turístico. A presidenta da entidade provincial, Carmela Silva, e o presidente do Clúster TIC Galicia, Antonio Rodríguez del Corral, inaugurarán a sesión ás 9:45 horas. Segundo explican, na xornada xúntanse as personalidades máis relevantes no eido da aplicación das TIC no turismo.
O obxectivo da xuntanza de traballo é “crear un punto de encontro para analizar e informar sobre as oportunidades do emprego das TIC nas empresas turísticas, que favorecen a evolución cara novos modelos de negocio”. Desta maneira, afondarase en temas como: o turismo do século XXI, a innovación como motor de cambio do sector, a mellora da experiencia do visitante e o mantemento no tempo de turistas, o impacto das TIC no sector e a evolución da comunicación turística.
Entre as persoas encargadas de impartir conferencias mañá en Soutomaior destaca Raúl Jiménez, fundador e director executivo de Minube; Meritxell Marcos, directora de Paradores de Pontevedra e Cambados; Víctor Longo, director executivo de Partee; Chiú Longuina, director executivo de Pumpún Dixital; Xoel Vázquez, director executivo de Xoia Software; Susana Pérez, presidenta de Empresarias de Galicia; Antonio Rodríguez del Corral, presidente do Clúster TIC Galicia; Mar Rodríguez, directora executiva de Teetravel, Cristina Collazo, directora executiva de Volta Montana; Alberto Ribas, blogueiro de Alvientooo; Leticia Pérez, de GaliciaTB; Alberto Traversa, coeditor de La Alacena Roja; Carmen Delia Díaz, directora executiva de Escapalandia.com; e Carlos Romero, director de I+D+i de SEGITTUR.
Amais, no marco da xornada, a partir das 17.00 horas, a presidenta Carmela Silva, xunto aos deputados Javier Dios e Santos Héctor, farán entrega dos primeiros premios ao Talento Turístico da provincia de Pontevedra que contan con cinco modalidades: Talento Turístico Sustentábel, Talento Turístico Innovador, Talento Turístico Gastronómico, Talento Turístico Experiencial e Talento Turístico TIC.
A xornada enmárcase na iniciativa da Deputación de Pontevedra TurisTIC. A través deste programa, e partindo das obxectivos do Plan Estratéxico de Turismo, o Goberno de Carmela Silva pretende “potenciar e axudar ao sector provincial na súa adaptación ao entorno dixital para mellorar a súa competitividade”.