Santiago convértese en abril nun cinematográfico obradoiro sobre datos
luns, 10 de febreiro do 2020
Os
datos mostran hoxe en días importantes oportunidades de
desenvolvemento económico e empresarial, pero coa vantaxe, en
comparación con outros recursos dos que podemos botar man, de ser
sustentábeis, accesíbeis, universais e enriquecedores. Sobre esta
premisa e dándolle un toque lúdico, entretido e cinematográfico, o
grupo GRID da Universidade de Santiago vai desenvolver os días 27 e
28 de abril unha iniciativa de divulgación arredor do coñecemento e
os tesouros que nos pon ao noso alcance: a iniciativa Stat Wars: o
Imperio dos Datos.
A
actividade será no Auditorio de Galicia e convócase co obxectivo de
mostrar ao “alumnado de ESO e Bacharelato todas as utilidades da
estatística, así como as súas aplicacións noutras disciplinas
para a resolución de problemáticas habituais”.
Ambientada
na coñecida saga cinematográfica Star Wars e empregando un
enfoque baseado na metodoloxía “aprender-xogando”, Stat Wars
porá o foco en atraer o máximo interese dos estudantes e fomentar a
súa participación, “transformándoos en estatísticos por un
día”, apunta a organizadora do certame Carmen Cadarso Suárez,
catedrática do Departamento de Estatística, Análise Matemática e
Optimización.
Os
centros de ensino interesados en participar deben contactar coa
organización a través do correo electrónico
proyecto.statwars@usc.es ou no teléfono 881812283 en horario de
10.00 a 14.00 horas. Esta iniciativa divulgativa conta coa
colaboración da Fundación Española para a Ciencia e a
Tecnoloxía-Ministerio de Ciencia e Innovación e da Rede Nacional de
Bioestatística (BIOSTATNET).
Xunto
á USC, toman parte do evento as universidades e Navarra, Almería,
País Vasco, Autónoma de Barcelona, Politécnica de Cataluña,
Carlos III de Madrid, Salamanca, Castela-A Mancha e Valencia.
