Samsung supera os 30 millóns de GALAXY S III vendidos

A ofensiva de Apple contra Samsung parece estar cada día máis xustificada, pois o fabricante surcoreano está a publicar uns datos de vendas realmente envexables, e tras dar conta de que o seu GALAXY Note II superou os 3 millóns de terminais vendidos, informan agora de que o Samsung GALAXY S III conseguiu vender 30 millóns de unidades nuns 5 meses, mellorando considerablemente a velocidade de adopción dos seus modelos predecesores.
De feito, o ano pasado nun período semellante o Samsung GALAXY S II conseguiu chegar aos 10 millóns de unidades vendidas e no seu día o Samsung GALAXY S tardara 4 meses en vender 5 millóns de unidades, polo que o ritmo de crecemento do móbil insignia de Samsung é impresionante.
O Samsung GALAXY S III é un móbil con Android 4.1 e pantalla Super AMOLED de 4,8 polgadas, o que podería dar a entender que non sería un produto para unhas vendas tan masivas como as que está a experimentar, dando a impresión de que a familia GALAXY S vende máis canto maior é o seu tamaño de pantalla (comezou en 4 polgadas), tendencia contraria á que vivía o mercado móbil antes da emerxencia dos smartphones.