Remata o segundo Foro INDCREA cun chamamento a impulsar a nosa terra dende a innovación cultural
venres, 20 de xullo do 2012
Chegou á súa fin a segunda edición do Foro
Internacional INDCREA, organizado polo Consello da Cultura galega e a
Consellería de Cultura (axencia AGADIC) na Illa de San Simón co obxectivo de
materializar novos xeitos de rendibilizar a nosa cultura e adaptala aos contornos
da innovación e da comunicación dixital. Entre o máis salientábel do fornecido
polo foro, cóntase sen dúbida a elaboración dun documento de conclusións, da
man do comité científico da xuntanza, no que se defende o valor da cultura como
vía para xerar negocio. Asemade, constatouse a preocupación da industria
audiovisual contra as vindeiras subas de 13 puntos no IVE (do 8 ao 21% en todo
tipo de espectáculos culturais) e defendeuse,
unanimemente, un papel máis activo e decidido das industrias do sector no pulo
de Galicia.
O encontro, que reuniu a máis de 50
especialistas do ámbito galego e internacional, artellouse en15 sesións de
traballo nas que se abordou o potencial da ligazón cultura-innovación como piar
de desenvolvemento futuro, alternativo e ceibe, baseado en dous ingredientes
sen data de caducidade: coñecemento e colaboración.
Segundo se fai saber dende AGADIC, o devandito
escrito refírese ao novo paradigma de comunicación cultural, no que entran como
fortes condicionantes os novos soportes (redes sociais, pantallas, smartphones…) para determinar unha bidireccionalidade
nas mensaxes que achega unha utilidade potencial moi elevada para os emisores.
Do mesmo xeito, o encontro serviu para perfilar ao consumidor do século XXI
como máis formado, informado e esixente. “É
un consumidor global que fai uso das novas tecnoloxías”, dise no documento.
Nel tamén se especifica que por estes motivos, polo acceso total á Sociedade da
Información, fanse máis necesarios que nunca recursos que fagan máis doado un
consumo intelixente e racional, respectuoso cos contidos e os autores.
Organizado polo Consello da Cultura Galega, a
Axencia Galega das Industrias Culturais (AGADIC) e a Fundación Illa de San
Simón, o proxecto INDCREA é unha iniciativa do Laboratorio Permanente de
Industrias Culturais (LAPIC) que ten como obxectivo analizar e atopar novas fórmulas
(a través do debate, a reflexión e mesmo a investigación) que permitan enfrontar
con éxito os desafíos de futuro das industrias culturais e creativas, un sector
estratéxico en Galicia non só polo seu capital artístico senón tamén pola
importancia do tecido produtivo relacionado, e que se caracteriza por unha grande
capacidade de xeración de emprego e de resistencia á crise económica.