Recoñecemento a un proxecto galego que permite o acceso ás TIC das persoas con lesión medular
luns, 16 de abril do 2012
- Membros do grupo da UDC nunha imaxe publicada na web da Asociación Española Contra o Cancro, AECC
A nova investigación tecnolóxica segue a bo
ritmo, e os recoñecementos nacionais e internacionais así nolo recordan. De
investigación galega e de recoñecementos é do que nos
fala este luns a Universidade da Coruña, que é onde se insire un equipo de
I+D centrado en tirar partido das posibilidades das novas tecnoloxías, as TIC,
para mellorar a calidade de vida das persoas dependentes. Pois ben, o equipo en
cuestión é o Grupo RNASA-IMEDIR, responsábel
dunha ferramenta que facilita o acceso ao computador de persoas con lesión
medular. A ferramenta, desenvolvida polo equipo galego en colaboración coa Unidade de Lesión Medular do Complexo
Hospitalario Universitario da Coruña, foi recoñecida cun galardón pola Fundació
Agrupació Mútua de Barcelona.
A distinción
inclúe unha contía de 15.000 euros e foi concedida ao grupo polo seu traballo
no desenvolvemento de contornos e aplicacións informáticas accesibles
especialmente deseñadas para persoas con diversidades funcionais. En concreto,
a investigación deste equipo permitirá ás persoas afectadas por lesión medular
alta dispoñer dunha importante ferramenta que facilitará o seu acceso ao
ordenador e por tanto a súa participación social.
O grupo
RNASA-IMEDIR, dirixido polo catedrático Alejandro Pazos Sierra, xurdiu no ano
1989 co obxecto de levar a cabo traballos e proxectos de investigación
relacionados coa Intelixencia Artificial, especialmente na Área de Sistemas
Conexionistas, aplicando as Redes de Neuronas Artificiais á resolución de
problemas complexos do mundo real, e abarcando, sobre todo, a área da medicina.