Premiados na USC dous proxectos de investigación histórica e de innovación tecnolóxica en reputación en liña
venres, 27 de febreiro do 2015
Esta semana pechouse
na Universidade de Santiago a segunda entrega do programa Argos,
que impulsou a creación de equipos de persoas emprendedoras para o
desenvolvemento de negocios innovadores e con potencial rendíbel. O
peche da segunda edición formalizouse cunha entrega de premios, cos
que se quixeron recoñecer as iniciativas emprendedoras máis
salientábeis. Por unha banda distinguiuse o proxecto Nexos,
promovido por Balbina Gándara Antelo e Jessica Méndez Lema, unha
proposta para rendibilizar a investigación histórica, e pola outra
Nostraker, impulsada por Iván Dobarro Montaña e María Cruz
Negreira Ruíz, que consiste nun proxecto que segue e avalía as
opinións de servizos tecnolóxicos.
Nexos e Nostraker
impuxéronse nas modalidades Argos Enxeño e Argos Spin,
respectivamente. Cada premio, informa a USC, supón unha achega en
metálico de 3.000 euros, seis meses de acceso de balde a espazos de
acubillo e asistencia técnica durante o proceso de constitución da
empresa.
Nun plano máis
detallado, Nexos propón traballar en actividades de
investigación histórica con aplicacións nos ámbitos do dereito, a
documentación de bens do patrimonio cultural, a comunicación
empresarial e institucional e a xenealoxía. Nostraker é un
proxecto emprendedor orientado á oferta de produtos e servizos de
innovación tecnolóxica para o seguimento e a análise da reputación
en liña. Argos convocou dúas categorías segundo a orixe da idea de
negocio: Argos Spin, para proxectos empresariais xurdidos a partir
dalgún resultado de investigación xerado na USC; e Argos Enxeño,
dirixido aos proxectos xurdidos das ideas de negocio achegadas polos
participantes no programa.
Xunto estas dúas
propostas outros tres proxectos completaron o programa de Argos:
Mobiliza -empresa de reinserción social e laboral de ex
reclusos-, na convocatoria de Argos Enxeño, e Advanced Optical
Solutions (AOS) - solucións ópticas avanzadas no eido da visión
e a oftalmoloxía - e Silicon Design Solutions, Arithmetic
Processors -solucións globais de calidade a través da
utilización de resultados de investigación punteiros- na de Argos
Spin, que recibiron un diploma acreditativo de ter completado as
distintas etapas de Argos.
O reitor Juan Viaño
presidiu a entrega de premios aos equipos de emprendedores
resultantes nun acto no Salón Reitoral do Colexio de San Xerome.
Tamén interviñeron a concelleira de Educación e Xuventude do
Concello de Santiago, Maite Cancelo Márquez; o director de Servizos
da Axencia Galega de Innovación, José Manuel Abella Anido; o
director de Competitividade do IGAPE, Norberto Penedo Rey; e o
director da Área de Valorización, Transferencia e Emprendemento da
USC (AVTE), José Luis Villaverde Acuña.