Poio reclama a Movistar a dotación de fibra óptica nos lugares do concello que aínda carecen dela
venres, 17 de xullo do 2020
O
Concello de Poio quere mellorar a cobertura tecnolóxica no seu
territorio, garantindo a dispoñibilidade dos máis óptimos accesos
ás redes para todos os fogares e empresas, mesmo para as emprazadas
nos recantos máis afastados da contorna urbana. Seguindo este fío,
o
Concello anunciou que vai remitir á operadora Movistar un escrito
para instala a habilitar fibra óptica nas zonas “que hoxe aínda
carecen de cobertura axeitada, malia contarse, na maioría dos casos,
coas infraestruturas necesarias”. A tenente de alcalde e
concelleira de Servizos e Obras, Chelo Besada, lembrou que as
previsións que a entidade manexaba no seu momento eran de dotar a
prestación ao 100% do ámbito municipal.
A
edil recordou tamén que o Concello de Poio iniciou hai máis de dez
anos os trámites e actuacións necesarias para que as parroquias da
vila contasen con fibra óptica: “Empezamos con estas xestións en
2009 e a día de hoxe temos cuberto unha gran parte de todo o
territorio municipal”. Porén, quixo destacar que malia os esforzos
desenvolvidos en emprazamentos e zonas da súa titularidade, “hai
lugares que dependen outras administracións”. Este, dixo, é o
caso da zona de Covelo (Samieira), na que “a veciñanza reclama a
dotación de fibra e cobertura axeitadas”. Segundo informou, nesta
zona o servizo é achegado por unha empresa privada que “se rexe
por motivos económicos, e cando hai dificultades, nós sempre
tratamos de mediar, mesmo á hora de facilitar a dotación de terreos
para a instalación de postes e cableado cando existe algunha
reticencia por parte de propietarios”.
A
edil mostrou o seu interese en facer que toda veciñanza dispoña
dunha conexión a Internet destas características, un “ben básico
para o sector comercial e empresarial e para os particulares”, que,
durante o confinamento, “víronse na obriga de teletraballar e
teleformarse” e puideron comprobar, novamente, o fundamental que é
contar con conexións que cumpran un mínimo de calidade.
A
tenente de alcalde entende que, para chegar ao 100% de cobertura no
concello, é preciso que sexa “a empresa responsábel quen
subministre o servizo, máxime tendo en conta que existe un convenio
entre a entidade e o Estado, a través da cal a firma recibe
investimentos para dotar a todo o territorio nacional de fibra
óptica”.