Os enxeñeiros en Informática informan polo miúdo ao BNG da problemática da profesión

Para os membros do Colexio Profesional de Enxeñería en Informática de Galicia (CPEIG) este intre que estamos a vivir de campaña preelectoral é un intre especialmente axeitado para relembrarlles as súas demandas aos partidos políticos que entran en xogo nos comicios e saber, de primeira man, até que punto estes terán en conta as súas propostas no programa de goberno para os vindeiros catro anos. É nesta liña de achega de solicitudes e demandas onde se insire, precisamente, a reunión mantida onte en Santiago entre os representantes do devandito Colexio e a candidata número dous do BNG pola provincia da Coruña, Ana Pontón. Máis polo miúdo, a xuntanza serviu entre outras cousas para que os colexiados lle fixesen chegar a súa inquietude sobre o estado de desregularización no que se atopan tanto os estudos de Enxeñería en Informática como a propia profesión en si mesma.
A reunión, que para o CPEIG tivo o seu precedente directo noutra xuntanza mantida a semana pasada co candidato popular Alberto Núñez Feijoo (estando pendente arestora a confirmación do encontro co PsdeG), contou coa presenza de Fernando Suárez Lorenzo e Xosé Antón Campos, presidente e vicetesoureiro do Colexio (respectivamente) do Colexio. Ambos os dous coincidiron á hora de sinalar a gran problemática actual deste sector laboral na nosa terra: a ausencia de regulación e dunha responsabilidade profesional que veña obrigada e garantida por lei.
O obxectivo desta demanda, sinaláronlle á candidata do BNG, non é outro que mellorar na medida do posible a calidade dos recursos que se ofrecen, amais de protexer á cidadanía de posibles fallos informáticos motivados pola neglixencia ou pola falta dunha preparación e certificación axeitadas. “O reforzo da Enxeñaría Informática”, engadiron, “redundará, en último termo, no progreso e competitividade de Galicia e de España”.
Amais destas peticións, o compromiso polo reforzamento do papel da profesión na nosa terra tivo perante Ana Pontón outra solicitude ben concreta de cara aos vindeiros catro anos de lexislatura: a creación dun corpo específico para a súa titulación na Administración autonómico de maneira que se aposte de xeito firme polos titulados e tituladas nas distintas enxeñerías de informática como garantes da boa saúde dos sistemas informáticos. Ao seu xuízo, este labor continuo e optimizado de supervisión é fundamental, tendo en conta o papel cada día máis importante que teñen os ditos sistemas para o bo funcionamento dunha chea de eidos da nosa sociedade: transporte, xustiza, sanidade, protección da cidadanía, etc.
No que se refire á postura adoptada pola candidata nacionalista durante a reunión mantida en Santiago de Compostela, sinalar que en liñas xerais se baseou nun recordamento abondo concreto: o do compromiso do BNG cara a regularización dos estudos e máis da profesión. Para Ana Pontón, o primeiro gran paso que cómpre dar cara o ordenamento do panorama tecnolóxico-dixital galego é a integración nunha única consellería de todas as competencias do Goberno da Xunta en materia de novas tecnoloxías da información.