Os dominios .es pecharon ao ano con 1.614.149 rexistros

Os dominios .es rexistraron un medre interanual do 10,68% no ano que vimos de deixar atrás, segundo vén de informar no seu novo balance a entidade Red.es, que é o organismo público-empresarial que se encarga da súa xestión. Esta taxa de crecemento significa entre outras cousas que se chegou a unha cifra total de 1.614.149 dominios ao peche do ano. Segundo informa Red.es, este dato pon de manifesto a sustentabilidade no tempo da evolución dos .es, amais da súa suba imparábel. A significativa cifra do millón e medio de rexistros acadouse a finais do primeiro trimestre do 2012 e producíronse 1.000 novos rexistros diarios de media.
Ao comezo de 2013, engade Red.es, o rexistro .es mantén o seu status entre os vinte primeiros rexistros de dominios a escala global por número de dominios adquiridos.
Asemade, supoñen aproximadamente o 50% do mercado dos nomes de dominio en España e, desde o ano 2007, afianzáronse como referenciais por enriba dos .com. “De feito, mentres o crecemento interanual dos .es foi case dun 11% en 2012, o dos .com pechou o ano cun 7,51%”, engade Red.es Segundo os datos de decembro de 2012, a distribución dos diferentes indicativos en España confirma o dito papel referencial, cun 48,99 %; seguidos polos .com, cun 39,83%.