Os Premios Prismas recoñeceron na Coruña o labor inclusivo de 7 proxectos científico-tecnolóxicos

Este 19 de novembro entregáronse na Coruña os Premios Prismas, que recoñeceron no seu 35 aniversario o importante labor social e inclusivo de sete proxectos científicos e divulgativos. Na gala participou a alcaldesa Inés Rey, quen lembrou que os galardóns veñen da man do Concello a través dos Museos Científicos, e que este ano puxeron o foco (especialmente) na innovación e na capacidade divulgativa para achegar o público a diferentes cuestións científicas. "Ademais de ser xa unha cita habitual, este é tamén un dos actos máis simbólicos e emotivos deste Concello", dixo Inés Rey. No certame, distinguiuse (entre outros) o proxecto Talentos Inclusivos do CITIC.
Palmarés
O Prisma Especial do Xurado foi para o investigador Enrique Pérez Montero, do Instituto Astrofísico de Andalucía do Consello Superior de Investigacións Científicas (IAA-CSIC) polo seu traballo para achegar a ciencia ás persoas con discapacidade visual e facer reflexionar ao conxunto da sociedade.
O certame premiou cun Prisma de Bronce os mellores traballos en sete categorías: Vídeo, Novos medios, Libro editado, Artigo xornalístico, Radio, Proxectos singulares e Prisma Especial do xurado. Ademais, todas as modalidades, excepto a de Libro editado e a de Prisma especial do xurado, recibiron un premio de 4.000 euros.
O mellor traballo en vídeo foi para Camino a Congreso, unha serie web do IAA-CSIC, por unha ficción audiovisual de gran calidade técnica que retrata con humor o día a día dun equipo científico. O capítulo premiado relata como dous membros do equipo investigador do Instituto de Astrofísica de Andalucía embarcan nunha viaxe a Congreso, unha localidade de Almería, para chegar a tempo a un obradoiro de expertos en evolución galáctica.
O mellor traballo en Novos medios recaeu en Yonki Books, de Oihan Iturbide, por achegar recursos de gran calidade, con riqueza de formatos e perspectivas, sobre as adiccións, un problema arrodeado de estigmas e prexuízos. Trátase dun sitio web que presenta recursos en diversos formatos (libros, entrevistas...) para abordar a adicción e os trastornos asociados ás substancias ou determinados comportamentos.
O mellor libro editado foi Acoso, de Ángela Bernardo Álvarez, en Next Door Publishers, por “presentar unha investigación rigorosa sobre o acoso, un problema de gran transcendencia que afecta aos dereitos fundamentais das persoas que se dedican á ciencia”. Segundo o xurado, o libro “desprega un traballo xornalístico sobre o acoso sexual e o acoso por razón de sexo nas universidades e nos organismos públicos de investigación”.
Historia de un secuestro génetico, así fue como una mosca robó "superpoderes" a una planta, de Jesús Méndez González, foi recoñecido como mellor artigo xornalístico. Publicado na Axencia SINC, converteu unha investigación de ciencia básica e moi pouco coñecida nunha historia fascinante de gran calidade xornalística. “O artigo describe o primeiro caso de transferencia xenética que se observa entre un vexetal e un animal complexo, e que funciona”, salientouse.
Como mellor proxecto singular galardoouse Dones de ciencia, promovido pola Universidad Politécnica de Valencia, por “visibilizar a científicas contemporáneas nun proxecto de amplo alcance que combina arte e ciencia coa a participación da cidadanía”.
O xurado tamén decidiu outorgar unha mención especial a La ciencia del chup chup, de Elena Sanz, na modalidae de Libro editado, neste caso en Editorial Planeta; e unha segunda mención especial na modalidade de Proxecto singular a Talentos Inclusivos, do CITIC (Universidade da Coruña) e ASPACE.
Por último, decidiu declarar deserto o Prisma ao mellor texto inédito ou autoeditado de divulgación científica.
Presidiu o xurado Pampa García Molina, xornalista científica, coordinadora do Science Media Centre España; e integrado por María Viña Rebolledo, xefa de sección técnica do MUNCYT (Museo Nacional de Ciencia e Tecnoloxía); Núria Jar Benabarre, xornalista científica; Isidora Fernández Bañados, especialista en compromiso científico en Science for Change; Félix Sánchez-Tembleque Díaz-Pache, técnico superior no CITEEC- Universidade da Coruña; e Iván Rodríguez Arós, artista especializado en divulgación científica en Divulgare-Universidade de Vigo; actuando como secretario Marcos Pérez Maldonado, xefe de servizo dos Museos Científicos Coruñeses.