Ocean´s vai pór en marcha unha rede de servizos converxentes de última xeración
venres, 26 de xullo do 2013
O operador galego Ocean´s
está a piques de amosar un dos seus proxectos máis ambiciosos: a
súa nova rede de servizos converxentes de última xeración. De
feito, a compañía informa que xa puxo en marcha a conta atrás para
presentar a súa nova plataforma, “propia e independente”.
Segundo engaden fontes da empresa, estamos ante algo máis que un
produto innovador, estamos ante “unha nova filosofía de
traballo onde o cliente poderá xestionar tódalas súas
comunicacións de xeito máis cómodo, sinxelo e rendíbel”.
Coa rede de seu, Ocean´s centrará unha boa parte dos seus esforzos
en achegar o último en novas tecnoloxías, tanto en comunicación,
servizos e dispositivos fixos como en telefonía móbil, “na que
se incluirá a tecnoloxía 4G”, seguindo as tendencias do
sector.
Segundo avanza a
operadora, esta rede permitirá integrar nun único recurso tódolos
servizos que até o de agora funcionaban de xeito individual, no caso
de clientes residencias e no de empresas. Entre as funcionalidades a
pór en xogo, a firma salienta a posibilidade virtualizar as
comunicacións: liñas, servizos e centrais telefónicas. Tamén se
ampliará a marxe para impulsar a telepresenza (de gran potencial a
nivel empresarial e a nivel de saúde e atención sanitaria). Estes
produtos e servizos incluiranse nunha única factura facilitando ao
usuario a súa xestión.