O proxecto europeo HERIT colle impulso este martes no CITIC

O Centro de Investigación TIC (CITIC) da Universidade da Coruña acollerá o martes 24 de maio unha reunión de traballo do proxecto europeo HERIT: Heritage Efficient management through Relevant IT use, no que participa o centro galego xunto co CUFIE e o Grupo de Estudos Territoriais da UDC e outras seis entidades europeas. HERIT é un proxecto financiado polo programa Erasmus+ que ten como obxectivo “impulsar as competencias dixitais de propietarios/as privados/as de casas históricas, axudándolles a facer fronte ao impacto da pandemia no turismo cultural”.
O elemento central de HERIT é a creación dun curso en liña masivo e aberto (MOOC) destinado ás persoas propietarias de casas históricas. No proxecto o CITIC aportará a súa experiencia na posta en marcha de ferramentas dixitais dirixidas á formación. Así, a través deste curso, os/as participantes poderán adquirir habilidades e coñecementos axeitados para manter os seus edificios históricos en materia de desenvolvemento empresarial, marco normativo e xurídico, etc.
O acto de apertura contará coa presenza do director do CITIC e catedrático de IA na UDC, Manuel F. González Penedo, e o coordinador de proxectos da European Landowners’’ Organization, Daniel Monteleone.
A investigadora Laura Nieto lidera o grupo de investigadores/as do CITIC que toman parte no proxecto. As demais entidades participantes son a European Landowners Organization e European Historic Houses de Bélxica, a Asociace Majitelů Hradů a Zámků de República Checa, Invasioni Digitali de Italia, a Université Paul-Valéry Montpellier de Francia, e On Projects de España.