O investigador da UDC Pablo Montero recollerá en Nova York dúas relevantes distincións
venres, 16 de novembro do 2018
Pablo
Montero, investigador da Universidade da Coruña e pertencente ao
grupo
MODES que coordina dende o Centro de Investigación TIC (CITIC) o
catedrático Ricardo Cao, recibirá os días vindeiros dous
importantes recoñecementos. Trátase
do Premio ao Mellor Estudante de Doutoramento e o segundo Premio na
competición internacional M4 que organizan en Nova York a
Universidade de Nicosia e máis a NYU Tandon School of Engineering.
Estas
distincións serán entregadas o 10 de decembro en Nova York,
precisamente, a onde acudirá Montero para recollelas. Como
lembraremos, viñeron dadas polo traballo desenvolvido polo
investigador galego na Universidade de Monash, en Melbourne
(Australia), xunto co investigador Thiyanga Talagala e os profesores
George Athanasopoulos e Rob Hyndman.
Respecto
do programa da conferencia M4, será un evento tecnolóxico
internacional de primeira liña, incluíndo a presenza de destacados
oradores das principais compañías do mundo de software e
tecnoloxía, como Google, Microsoft, Amazon, Uber e SAS, así como
académicos de universidades referenciais, que debaterán sobre os
últimos avances en métodos de predición (forecasting).
A
competición M4 na que participou o investigador da UDC está aberta
a profesionais e investigadores de todo o mundo. Segundo informa a
Universidade da Coruña, a finalidade é facer predicións dos
valores futuros de 100.000 series temporais facilitadas pola
organización procedentes de áreas de finanzas, macro e
microeconomía, industria e datos demográficos. Os participantes
envían as súas predicións e a organización, que dispón dos
valores futuros reais das series, determina cales son os mellores
participantes dunha maneira obxectiva, medindo o que se desvían as
súas predicións da realidade mediante unha fórmula matemática.
Nesta
edición, segundo explica Pablo Montero, fíxose especial fincapé na
“reproducibilidade científica dos resultados”, isto é, “que
os métodos que participaron fixéronse públicos para que tanto o
mundo académico como a industria se poidan beneficiar dos últimos
avances na área”.
Participaron
equipos de 17 nacionalidades distintas, tanto individuais como
grandes empresas e universidades como a Universidade da Coruña, Bath
ou Oxford.
Como
dixemos, Pablo Montero competiu cun equipo formado por membros da
Universidade de Monash, en Melbourne, Australia: a estudante de
doutoramento Thiyanga Talagala e os profesores desta universidade
George Athanasopoulos e Rob Hyndman. O método proposto por este
equipo Monash-UDC acadou o segundo premio na categoría absoluta
medindo a precisión das predicións. Pola súa parte, Montero
conseguiu o premio ao Mellor Estudante de Doutoramento, patrocinado
pola empresa Uber, por ser o mellor método proposto por un
estudante.