O conselleiro delegado de R sostén que o compromiso da operadora con Galicia é inquebrantábel
luns, 10 de febreiro do 2020
Este
luns 10 de febreiro celebrouse un novo coloquio da Tribuna do Círculo
de Empresarios de Galicia, un encontro empresarial que contou coa
presenza do conselleiro delegado de R e do Grupo Euskaltel, José
Miguel García, que debullou as Claves para competir nunha
contorna global dixital ante un nutrido grupo de directivas e
directivos das empresas galegas. García apoiou parte da súa
intervención nun dos grandes obxectivos da operadora de
telecomunicacións con respecto ao tecido produtivo da súa contorna
(a nosa): “Queremos que as empresas galegas sigan medrando con R
grazas á nosa expansión nacional”. Segundo explicou, o crecemento
da operadora, un proceso que vai seguir “un modelo operativo único
e eficiente”, será un elemento de impulso para as firmas da nosa
terra.
Tamén
fixo saber que, alén da folla de ruta para o espallamento de R e do
grupo do que forma parte (Euskaltel), o compromiso de R con Galicia
“é inquebrantábel e tradúcese en máis de 1.300 millóns de
euros investidos dende o seu nacemento nun proxecto que xa chega a
preto de 140 municipios da Comunidade Autónoma”.
Tras
ser presentado pola presidenta do Círculo, Patricia García e por
David Regades, delegado da Zona Franca de Vigo, García puxo o foco
en como a aparición das novas tendencias está a transformar os
hábitos dos consumidores: “Os servizos OTT están a impulsar unha
conversión radical en gran cantidade de sectores e ningunha persoa
nin empresa pode obviar esta realidade; temos que adaptarnos e tirar
o máximo partido da transformación para facer a nosa vida máis
fácil e optimizar os nosos negocios”, asegurou.
Segundo
engadiu, a expansión do grupo polo resto do territorio estatal onde
“aínda non estamos presentes” será un factor clave tamén en
Galicia, “porque seguiremos dando percorrido a este compromiso
permanente co desenvolvemento do tecido empresarial galego”.
Tamén
explicou que a fórmula de crecemento en España aséntase na fórmula
de compartir redes con outros operadores “e consolidarnos como a
única empresa do sector deslocalizada de Madrid”. Trátase, dixo,
“dunha oportunidade de mercado única que non podemos deixar
pasar”.