O alumnado do programa Espazo Compartido da UDC visita o CITIC

luns, 18 de novembro do 2019 Redacción

O Centro de Investigación TIC (CITIC) segue dándolle continuidade á súa liña de divulgación integradora e diversa e de estímulo dos talentos investigadores: as futuras e os futuros representantes do noso tecido innovador e tecnolóxico. Nesta liña situouse a xornada de portas abertas cun grupo de alumnas e alumnos do programa Espazo Compartido da Universidade da Coruña, que visitaron o pasado venres a sede do centro TIC no Campus de Elviña.
A experiencia iniciouse cunha presentación do centro por parte do subdirector, Javier Pereira. Logo, o alumnado puido visitar a sala showroom do centro, onde os estudantes tiveron a oportunidade de probar diferentes aplicacións desenvolvidas con tecnoloxía de realidade virtual e interacción co mundo físico a través da plataforma Scratch e dispositivos como Micro:Bit. Tamén puideron explorar contornas de inmersión con lentes de realidade virtual para experimentar novas sensacións.
Espazo Compartido é un programa de formación en habilidades persoais, sociais e competencias básicas, para a empregabilidade e o fomento da inclusión laboral de mozas con diversidade cognitiva. Está promovido pola Universidade da Coruña a través do Centro Universitario de Formación e Innovación Educativa (CUFIE). Trátase dun proxecto pioneiro no sistema universitario autonómico e un dos primeiros a nivel nacional. O seu obxectivo principal é “incluír a persoas con características cognitivas diversas no espazo formativo universitario” e pretende, en última instancia, “que os estudantes avancen na construción dunha autoimaxe positiva e dun proxecto de vida que lles permita desenvolverse de maneira autónoma”.

PUBLICIDADE