O Smartbus de Huawei fixo unha parada en Vigo
xoves, 16 de xaneiro do 2020
Huawei
e o seu Smartbus, que levan de xira pola xeografía estatal dende
outono do ano pasado (visitando
30 cidades e 70 colexios), fixeron hoxe unha parada en Vigo, ao
abeiro desta segunda edición do seu periplo de divulgación
tecnolóxica. A
cita foi no Colexio Balaídos e nela participou, amais dos rapaces do
centro, o alcalde da cidade, Abel Caballero. Segundo informou
Huawei, o itinerario do Smartbus é un percorrido por centros
docentes de toda España dirixido a fomentar a educación, as
contornas tecnolóxicas seguras e a responsabilidade dixital.
Baixo
o lema Comparte sen arriscarte Huawei España definiu a
iniciativa como “un proxecto educativo dirixido a escolares”, que
promove “un uso seguro e responsábel” das novas tecnoloxías
entre nenos e adolescentes de entre 9 e 13 anos.
A
cita deste xoves en Vigo foi a primeira parada dunha xira que
abranguerá até finais de xaneiro outros centros de toda a
Comunidade galega. Durante estes días, máis de 1.500 estudantes,
pais e educadores atenderán as sesións didácticas que se
impartirán na aula móbil dirixidas a concienciar sobre bo uso das
TIC. Desde o pasado mes de setembro, o Smartbus pasou por nove
Autonomías de España e acolleu as visitas de máis de 18.000
persoas.
Abel
Caballero participou esta mañá na presentación porque “cando
recibín a invitación de Huawei tiven claro que tiñamos que
apoialos”, xa que “representa o futuro e o labor que está a
facer nos colexios é moi relevante”, explicou. Acompañado por
María Luisa Melo, directora de Relacións Institucionais e
Comunicación de Huawei, o rexedor insistiu en que iniciativas como o
Smartbus “achegan a tecnoloxía á sociedade e é importante que
todos os actores, públicos e privados”. Caballero, amais,
aproveitou a temática do encontro para lanzar unha proclama:
“Traballemos conxuntamente para axudar aos máis novos a detectar e
minimizar os riscos derivados do uso das novas tecnoloxías".
As
actividades
As
sesións que se desenvolven no vehículo intelixente teñen carácter
formativo pero tamén lúdico. A súa duración é de 55 minutos, con
25 persoas por clase, e inclúen dous educadores especializados e
experimentados, que levan a cabo unha aula escolar simulada no
interior do Smartbus. Este conta con dispositivos como tabletas,
smartphones e unha particular máquina de vending, que
serven para o desenvolvemento de sete actividades ou dinámicas
expostas durante a sesión informativa e didáctica.