O FMI, vítima dun ciberataque
luns, 13 de xuño do 2011
- Xuntanza recente dos membros do Fondo Monetario Internacional
Hai ataques informáticos dunha xornada e
outros que duran semanas e máis semanas. Entre estes últimos inclúese o
recibido polo Fondo Monetario Internacional ao longo dos últimos meses, un
ataque que probablemente non fose casual (tendo se cadra relación directa coas
moitas revoltas populares contra o sistema que se están a xerar en todo o mundo)
e que, segundo conta The New York Times reflectindo fontes oficiais relacionadas
co devandito organismo, foi “grave e
sofisticado”.
Malia que finalidade e procedencia do ataque
non estean aínda claras, o que se si sabe é que o obxectivo eran os servidores
do FMI. A cousa non é nova, e xa se tiñan detectado incidencias deste tipo
antes, a gran novidade reside en que a ameaza da que se fala estes días houbo
máis insistencia e, sobre todo, meirande coñecemento posto en xogo. Cómpre
sinalar que sobre as posibles causas do mesmo, barállase tamén que haxa algún
tipo de relación coa detención o mes pasado de Dominique Strauss-Kahn, ex
director do FMI, por ter abusado sexualmente dunha traballadora dun hotel en
Nova York. Segundo avanza a prensa en liña, tamén se cre que detrás destes
incidentes poida haber persoas procedentes dunha chea de países, e máis se
temos en conta a natureza da información do FMI, que dá acubillo a todo tipo de
actividades económicas internacionais, conversas entre líderes e proxectos a
curto, medio e longo prazo.
A importancia do ataque foi tal que o Banco Mundial,
lindeiro co FMI en Washington, chegou a interromper a ligazón cos computadores
do Fondo ao recibir novas do incidente.
Por certo que todo apunta a que a técnica
empregada foi o spear phishing, unha
estratexia da que é probable que moitos de nós fosemos vítimas e que se apoia
na execución dun programa en liña sen o noso coñecemento, pudendo activar este
programa unha cadea de descargas coa conseguinte entrada de internautas alleos.