O Centro Demostrador TIC de Galicia dará visibilidade ao noso software libre empresarial
luns, 27 de xuño do 2011
- Fachada do Centro de Novas Tecnoloxías de Galicia
A semana comezou con
intensa actividade tecnolóxico-dixital no barrio de Conxo de Santiago, xusto na
contorna onde tamén se empraza, casualidades da vida, a redacción de Código
Cero. Pois ben, malia levar xa unha chea de tempo en activo, dando acubillo a
todo tipo de accións divulgativas e formativas sobre o fenómeno dixital, o Centro de Novas Tecnoloxías de Galicia
(CNTG) situado na devandita parroquia santiaguesa adquiriu co comezo desta
semana un novo pulo e, por dicilo de algunha maneira, unha segunda vida. Isto
vai ser posible grazas ao Centro Demostrador TIC que se puxo en marcha este
luns, oficialmente, nas súas dependencias, un espazo de investigación
inaugurado polo presidente da Xunta, Alberto Núñez Feijoo, destinado á promoción
dos nosos programas e, tamén, “como
escaparate dos produtos do sector do software libre en Galicia, que xa factura
preto de 20 millóns de euros ao ano”.
Así se expresou a asociación AGASOL, unha vella coñecida do CNTG (onde
soe dar
conta das moitas vantaxes das ferramentas abertas para as nosas empresas)
que este luns 27 volveu tomar a palabra para recordarnos algo que nos convén: o
software libre é máis barato, máis adaptable ás nosas necesidades, contribúe a
unha meirande estandarización e usabilidade
informática e, tamén, pode xerar máis riqueza no subsector do deseño e desenvolvemento informático.
Co fin de subliñar todos
estes argumentos e darlles corpo, AGASOL complementou a inauguración oficial do
Centro Demostrador, precisamente, cunha demostración. Nela, fíxose fincapé na
utilidade de varias aplicacións desenvolvidas sobre software libre, “e por iso exentas do pago de licenzas”,
cousa a ter en moi en conta nestes tempos en que non sempre se pode obter, nun
único paso, aforro e competitividade dunha soa tacada. Na apertura deste espazo
de traballos virtuais e divulgación tamén participou, como dixemos, Alberto Núñez
Feijoo, quen salientou a amplitude de posibilidades que se abre co novo centro
e (tamén) con esta aposta a prol do software libre que abrolla nodo mesmo
centro.
Á cita tamén acudiron
profesionais e empresarios dos máis variados sectores, que puideron dar conta
dos beneficios de programas como por exemplo OpenBravo, un sistema de información
xerencial mediante o que se pode manexar toda a información que xera unha
empresa. Tamén se fixo fincapé no Open Pos, unha ferramenta feita para
xestionar puntos de venda e que serviu de pretexto para unha interesante
demostración, unha toma de contacto na que quedaron claras as moitas
posibilidades que lles ofrece aos negocios hostaleiros de calquera índole,
entre outros moitos.
O Centro de Demostración,
dependente da Consellería de Traballo, operará como un centro formativo ligado
ao LPI, que é a entidade sen arela de lucro que certifica aos profesionais do
sistema operativo libre Linux. “Configúrase ademais”, engade AGASOL, “non só como centro formativo senón como
ponte para unha colaboración estable entre Administración e empresa e
escaparate de produtos e desenvolvementos”. Informar que AGASOL, a
Asociación de Empresas Galegas de Software Libre, agrupa ás 30 principais
compañías do sector do software libre en Galicia, que dan emprego a máis de 300
persoas e facturan preto de 20 millóns de euros ao ano.