O CPETIG achega a partir do venres unha formación intensiva sobre a ciberseguridade e os seus marcos normativos (ENS)
martes, 30 de maio do 2023
O
Colexio
Profesional de Enxeñaría Técnica en Informática de Galicia
(CPETIG) organiza esta semana, a partir do venres, unha actividade
formativa que bota luz sobre a implantación do Esquema Nacional de
Seguridade (ENS) da información. O obradoiro, en palabras do
CPETIG “unha formación de gran interese para os eidos da
seguridade, a xestión e a administración dos datos”, constitúe
unha das accións destacadas do ente colexial dentro do convenio de
colaboración que mantén coa Axencia para a Modernización
Tecnolóxica de Galicia (AMTEGA).
Trátase
dun obradoiro intensivo de 12 horas de duración a desenvolver en
modalidade online cunha extensión de 4 sesións a celebrar
durante dúas fins de semana consecutivas: venres 2 (de 17 a 20
horas), sábado 3 (de 10 a 13 horas), venres 9 (de 17 a 20 horas) e
sábado 10 de xuño (de 10.30 a 13.30 horas). Está aberto á
participación de calquera persoa ou representante do sector público
ou privado, e especialmente enfocado a perfís de delegados de
protección de datos, responsables de seguridade e administradores de
sistemas, con independencia do grao de coñecemento previo sobre a
materia a tratar.
Os
principais obxectivos de formación aos que se dará resposta con
estes contidos serán “coñecer os sistemas de xestión da
seguridade da información e os marcos normativos, a análise de
riscos derivados da implantación dun sistema de xestión da
seguridade, a categorización dos sistemas e a selección de medidas
de seguridade idóneas ou a elaboración de procedementos, normativas
e protocolos”, explicaron fontes do CPETIG.
Esta
formación será impartida por un equipo multidisciplinar de docentes
que proveñen de especialidades da confluencia entre os eidos
xurídico e tecnolóxico: Lucía Arias (Management, Governance- IT
Advisor en Govertis Advisory Services, S.L.), David Barrientos
Arboleya (DPD Certificado. Security & GRC Advisor en GOVERTIS
Advisory Services S.L.) e Amparo Romero (Consultora GRC en Govertis –
Telefónica Tech).
O
programa formativo estrutúrase en 3 grandes bloques: Introdución
e conceptos xerais do Esquema Nacional de Seguridade; Plan de
implantación do ENS e Revisión do SGSI e mellora
continua. En todos os módulos haberá casos prácticos para
complementar e afondar nos conceptos traballados.
Prezo,
descontos e rexistro
O
importe do curso formativo para o público en xeral é de 400 euros.
Os colexiados do CPETIG beneficiaranse dun desconto para membros do
90%, a través dun código que proporcionará o propio colexio. Do
mesmo xeito, existen bonificacións para os precolexiados e para os
colexiados de Enxeñaría Técnica e Enxeñaria en Informática
(deberán de consultar as condicións nos seus respectivos colexios).
O
CPETIG ten habilitada xa unha vía de rexistro no curso.