O CITIC estrea os Almorzos TIC Talk
xoves, 31 de marzo do 2022
O pasado martes 29
de marzo daba comezo o ciclo de xuntanzas Almorzos TIC Talk do CITIC.
Estes encontros están dirixidos a membros do CITIC que se atopan nas
primeiras etapas da súa carreira investigadora e están concibidos
para compartir a investigación que se realiza no centro nun ambiente
informal. Os Almorzos TIC Talk terán unha periodicidade mensual e
buscan potenciar a transversalidade amais de promover posíbeis
colaboracións entre o persoal investigador.
A primeira sesión foi a cargo de Alberto Manzano, que falou sobre
computación cuántica; logo chegou a quenda de Cristina Pelayo e
Francisco Pérez, que comentaron o seu traballo no eido do 3D Artist.
Os membros da comisión de formación, Álvaro Leitao e David
Vilares, presentaron a iniciativa xunto co subdirector Javier
Pereira, e deron paso a Alberto Manzano, que explicou os principios
básicos da computación cuántica e, máis en concreto, o seu
traballo centrado na creación de estratexias para reducir o erro
probabilístico en computación. A continuación, Cristina Pelayo e
Francisco Pérez amosaron o proceso de creación 3D e a aplicación
dos desenvolvementos no ámbito da mobilidade autónoma.
Para finalizar, o director do CITIC, Manuel F. González Penedo,
agradeceu a súa presenza a todos os asistentes e animou a participar
nos vindeiros encontros, que se celebrarán o último martes de cada
mes.