Novo fito da axencia publicitaria Nasas
luns, 9 de outubro do 2023
Nasas, axencia de
publicidade da Coruña, xa é empresa B Corp
polo seu cumprimento con altos estándares en termos de desempeño social e
ambiental, transparencia e responsabilidade empresarial. A comunidade de empresas B Corp
lidera un movemento global que está a transformar a economía en todo o mundo,
empregando a forza da empresa para xerar un impacto positivo. Algunhas B Corps
son, por exemplo, Patagonia, Ecoalf, Triodos Bank, Camper ou Central Lechera
Asturiana.
A obtención deste
selo B Corp converte a Nasas na única empresa non dedicada á sustentabilidade e
a única empresa do sector da comunicación que ten este certificado en Galicia.
A nivel estatal só outras 10 empresas de comunicación son B Corps e en toda
Galicia só hai 2 entidades máis que obtiveron esta importante certificación,
ambas dedicadas a produtos e servizos sostibles.
Tal e como
destaca a directora da axencia, Fátima Carmena Mayorga: “No caso de Nasas, a
certificación obtívose pola nosa operativa, é dicir, polas políticas
medioambientais , as condicións do equipo de traballo, o goberno ou a nosa
relación cos stakeholders e o trato a provedores, principalmente”, xa que o
negocio da axencia consiste en traballar con marcas de toda índole e con ánimo
de lucro, o que fai máis difícil e esixente o proceso de certificación.
Nasas, máis de 10 anos como referencia en creatividade e comunicación
Estes anos están sendo moi especiais para a axencia de publicidade coruñesa. Ademais de celebrar o seu décimo aniversario en 2022 e pasar a ser empresa B Corp en 2023, a axencia Nasas recibiu recentemente premios de publicidade a nivel internacional en Dubai, Francia, Estados Unidos, Reino Unido, Suíza e tamén a nivel estatal como un Premio Galicia Alimentación, un Premio da Publicidade en Galego ou varios Premios Paraugas. No 2022 situouse no Top 100 de axencias estatais e no Top 10 de Eficacia de todo o Estado.