Investigadores da UVigo traballan en aplicar tecnoloxía QR no coñecemento dos historiais médicos
luns, 17 de febreiro do 2014
A tecnoloxía dos
códigos QR é
sen dúbida unha das máis sorprendentes de cantas se teñen
propagado nos últimos anos. Que se xere tanta información a partir
de recadros tan miúdos e á vista tan indescifrábeis, aínda causa
un aquel de abraio malia estar espallados estes códigos en tantos
recantos da nosa vida cotiá. Ademais, hai que ter en conta outro
factor: a inmediatez e a accesibilidade que engaden á información e
á comunicación. Esta vantaxe e esta tecnoloxía QR son o alicerce
dun proxecto estatal no
que están a traballar os investigadores do Grupo
de Enxeñaría Telemática da EE de Telecomunicación.
Trátase dun proxecto
liderado pola universidade alacantina
Miguel Hernández para dar forma a un sistema de control -a
través dos ditos códigos de barras bidimensionais de lectura
rápida- para os alimentos que se subministran a pacientes por vía
intravenosa. O obxectivo é lograr que os profesionais da saúde
poidan coñecer, con só achegar o seu dispositivo móbil, a
composición dos alimentos e os medicamentos parenterais que reciben
aqueles doentes que non poden alimentarse polo estómago.
Segundo
informa a UVigo, a participación dos enxeñeiros galegos no proxecto
xorde despois de numerosas colaboracións con grupos de traballo do
ámbito clínico e da saúde de todo o ámbito estatal. O proxecto
como dixemos está liderado dende a UMH. Máis polo miúdo, polo
profesor de Historia da Ciencia, Javier Sanz Valero. A súa duración
é de tres anos e durante ese período crearase unha gran base de
datos que lle servirá ao especialista para ter, “de xeito sinxelo
e desde o seu propio dispositivo móbil”, toda a información da
historia clínica do paciente. Xunto á Universidade Miguel Hernández
e á Universidade de Vigo, no proxecto participan tamén
investigadores da Universidade de Granada e persoal clínico de tres
hospitais universitarios: o Complexo Hospitalario Universitario de
Vigo, o Xeral de Alacante e o Son Espases de Mallorca.
A iniciativa é
coñecida como Tecnoloxías de recoñecemento óptico aplicadas á
Trazabilidade e Análise de Perigos e Puntos Críticos de Control (APPCC) das mesturas de nutrientes parenterais. Ao
seu abeiro, o traballo dos investigadores ten ramificacións con
ámbitos que non lle soen ser propios ao devandito, como a
intelixencia artificial ou a web semántica. Segundo apunta o
profesor Luis Álvarez-Sabucedo, un dos docentes da UVigo implicados
nestes traballos e investigador de AtlantTIC, a iniciativa “consiste
en que sexamos quen de identificar, onde non había un patrón, que
tipos de pacientes son estatisticamente máis proclives a segundo que
situacións”. Polo tanto, do que se trata é de compilar
información deses procesos de calidade para despois poder procesala
e extraer conclusións que reduzan posíbeis riscos para o paciente e
fagan máis eficaz todo o proceso. O grupo galego, explica,
encargarse do desenvolvemento de diferentes interfaces sen fíos para
logo poder ser capaces de identificar eses patróns.