Internet en boas mans axuda aos nosos maiores a sacarlle partido á Rede
martes, 25 de xaneiro do 2011
Cando naceron os nosos avós e avoas, hai
máis de 60 anos, os ordenadores (que se inventaron alá polos anos 40), aínda
non eran nin a máis mínima parte do que son hoxe e o seu uso estaba destinado
unicamente a aquelas grandes empresas que atopaban neles utilidades que distan
moito dos PC de hoxe en día.
E qué dicir de Internet? Esta tecnoloxía
naceu practicamente antonte e ata hai poucos anos estaba unicamente ao alcance
da poboación máis moza, algo que, por fortuna, xa cambiou moito. Agora xa son
cada vez máis as persoas maiores de 60 anos que se conectan á Rede a diario e
PandaLabs achéganos datos sobre as súas características.
O 90 por cento dos internautas españois
de máis de 60 anos son varóns, “conéctanse
á Rede máis de cinco horas semanais e as súas principais actividades son ver
vídeos ou películas (no 100 por cento dos casos), consultar o correo
electrónico (97 por cento), ler novas (79 por cento) e realizar operacións
bancarias e compras (59 por cento)”.
Son datos que se desprenden da enquisa
sobre hábitos de Internet realizada por Panda Security, no marco da súa campaña
de educación e concienciación en seguridade Internet
en boas mans, dispoñible na
súa web oficial.
O estudo, realizado entre novembro e
decembro de 2010, preguntou a 1.850 internautas de máis de 60 anos sobre as
súas principais afeccións e actividades na Rede, así como o seu nivel de
seguridade e as principais dificultades que atopan á hora de adaptarse a un
medio tecnolóxico como é Internet, non sendo nativos dixitais.
O 68 por cento dos nosos maiores afirman “ter coñecementos medios sobre a Rede”
porén non participan activamente en foros, blogs nin redes sociais, por
consideralas “ferramentas para a xente
máis moza”.
Iso si, prefiren o e-mail para
comunicarse “cos seus” (o 97 por
cento) e un 50 por cento afirma realizar compras en liña, sendo a adquisición
de viaxes a opción máis escollida por este grupo (63 por cento).
As principais dificultades que atopa este
colectivo á hora de empregar os servizos de venda online son, nesta orde, “identificar
sitios seguros e de confianza”, “atopar
o que realmente buscan” e “ser quen
de definir contrasinais realmente seguras que posteriormente poidan lembrar”.
Asemade, atopan dificultade para encher formularios e seguir os procesos de
compra que establecen algúns sitios web.
Panda Security, a través da devandita
campaña Internet en boas mans,
pretende concienciar e educar aos nosos maiores no tocante á seguridade en
Internet, e vén de habilitar unha web na que ampliar o nivel de coñecementos
básicos sobre seguridade online de
toda a familia.
Nela, atópanse recollidas e clasificadas
as principais dificultades, ameazas e riscos que cada grupo de idade pode
atopar na Rede, así como consellos que axudan a incrementar a confianza online da comunidade española.