Helen Crompton impartirá no CITIC unha conferencia sobre Intelixencia Artificial na docencia

mércores, 8 de febreiro do 2023 S. P.

O vindeiro 22 de febreiro o Centro de Investigación da UDC (CITIC) acollerá a conferencia Artificial Intelligence in Education que estará impartida pola profesora da Old Dominion University Helen Crompton. A sesión, que dará comezo ás 17.00 horas, abordará as consideracións sobre o uso da IA na educación (AIEd), o que pode achegar ou os desafíos éticos que expón.
Presentaranse os resultados de dúas revisións sistemáticas sobre este tipo de ferramentas e sistemas avanzados no ensino primario e secundario, e a IA no ensino superior. Amais, ofrecerase información contextual, como o interese xeográfico pola AIEd, os niveis académicos e as disciplinas, a quen vai dirixida a IA e as tendencias no uso da IA de fronte ao futuro e as súas implicacións éticas.
Helen Crompton é profesora asociada de tecnoloxía educativa e doutora en educación matemática e tecnoloxía na educación da Old Dominion University de Norfolk, Virginia. Centra a súa investigación na aprendizaxe con tecnoloxías como os dispositivos móbiles, a Intelixencia Artificial e a Realidade Virtual. É directora do Technology Enhanced Learning Lab (TELL) e do Virtual Reality Lab.
A entrada é libre ata completar aforo.

PUBLICIDADE