Escoitar.org bota o peche e faino “ao grande” e de maneira colaborativa

Hoxe toca dar conta dunha triste nova: o peche de Escoitar.org, unha iniciativa moi envorcada na Rede e nas novas tecnoloxías que, como sinalamos hai agora unha década dende Código Cero (saudando cunha entrevista a chegada á nosa Internet de Escoitar.org), naceu co obxectivo xeral de permitirnos superar “unha xordeira de séculos” e cos obxectivos concretos de deixar para as vindeiras xeracións a posibilidade de ouvir como soaba a súa terra nos nosos días: o leste e o oeste, o silencio do bosque, o tren que transcorre lentamente na curva, o rincho da cancela. Ou, tamén, a fonte dos Peares, que é o son que nos vén de acompañar, agora mesmo e dende os altofalantes do computador, mentres visitabamos a web a xeito de despedida.
Hai dez anos saudabamos a iniciativa deste mapa colaborativo como “necesaria”, e seguimos a facelo. O porqué disto: son precisas canles e pontes que nos permitan ouvir o que acontece na Galicia que fai ficando deserta. Se cadra así poderemos de novo rehabitala, recupera e reivindicala.
Porén, a vida segue e Escoitar.org bota o peche logo dunha década de intenso traballo e de interesantes achados. Por exemplo a creación dun arquivo sonoro xeolocalizado en formato de cartografía no que todas e todos podíamos contribuír achegando sons e coordenadas, ou tamén o Mapa Sonoro de Vigo (feito con Ouvirmos), do que falamos en Código Cero.
Como lembraremos Escoitar.org era (é) tamén un colectivo, un conxunto de “reivindicadores do son” integrado por Berio Molina (artista e desenvolvedor web), Carlos Suárez (etnomusicólogo e compositor), Chiu Longina (antropólogo e artista sonoro), Enrique Tomás (enxeñeiro e artista sonoro), Horacio González (artista e desenvolvedor web), Julio Gómez (historiador e dinamizador cultural), Suso Otero (enxeñeiro de son) e Xoán-Xil López (musicólogo e artista sonoro).
O peche da web e do proxecto (motivado pola ausencia de apoios que axudasen ao mantemento dunha ferramenta tan interesante e tan positiva para o pobo galego e a Rede por enteiro, e igualmente para as galegas e galegos que se atopan lonxe) será gradual e cooperativo. Asemade, o proceso de peche ten vimbios para converterse en lendario, épico e referencial. De feito, cada vez que escoitemos unha das das 1.252 gravacións acubilladas en Escoitar.org, esta borrarase da base de datos.