En marcha unha nova web para mellorar a actividade dos nosos maiores, co-impulsada dende a UDC
xoves, 11 de xuño do 2020
As
profesoras
Viviana Fernández e Carmen Gómez, das universidades da Coruña e
Málaga, respectivamente, veñen de poñer en marcha unha páxina web
dirixida a dinamizar con recursos e actividades diversas de lecer e
formación o colectivo das persoas maiores. A web, visíbel en
quedateencasaactivo.app,
é unha nova e relevante contribución de contidos e servizos
tecnolóxicos para o sector da poboación máis castigado pola
pandemia, tanto no que se refire a incidencia da mesma como ás
limitacións de actividade e mobilidade derivadas do Estado de
Alarma.
O
sitio web, feito durante o confinamento, ten como obxectivo “axudar
a que os maiores teñan máis opcións ao pasar tanto tempo na casa e
contribuír á alfabetización dixital pois aínda que Internet está
ao alcance de todos non é tan sinxelo atopar recursos para os
maiores adultos”, explica Fernández.
O
proxecto ten o seu xermolo no traballo conxunto das dúas
investigadoras, que colaboran decote en proxectos de investigación e
artigos científicos, unha bagaxe compartida que lles valeu para pór
en marcha a iniciativa.
A
páxina amosa recursos asumíbeis sobre temas como cultura, deporte,
entretemento, vida saudábel e tecnoloxía, entre outros. Do que se
trata, indica a profesora Fernández, é de que os maiores sigan
activos en casa “escoitando música, visitando museos de forma
virtual, adestrando a memoria ou aprendendo novas destrezas”.
“Porque a actividade é saúde”, conclúe.