En marcha a primeira escola de programación galega, Hack a BOS
mércores, 7 de novembro do 2018
A
programación e as posibilidades de ampliar a nosa comunidade de
construtoras e construtores de ferramentas e servizos tecnolóxicos
non deixan de asentarse. En boa media, grazas a iniciativas como Hack
a BOS, a primeira escola de programación de Galicia, unha
iniciativa con metodoloxía bootcamp (ou sexa, ao
estilo dun acubillo-palestra para que os profesionais e as novas
empresas poidan dar forma ás súas ideas) onde poderemos adestrarnos
en programación en diferentes tempos (a tempo parcial ou a tempo
completo) e en períodos de entre 10 e 16 semanas. E todo isto,
sinalan os impulsores de Hack a BOS, tirando proveito de metodoloxías
áxiles, módulos de marca persoal e recursos humanos.
Segundo
nos conta de primeira man Brais Rodríguez, experto en mercadotecnia
de Hack a BOS, estamos a falar dunha escola de programación con
cursos intensivos de programación fullstack, con campus en
Galicia (e sede principal na Coruña) e co obxectivo de impulsar os
nosos profesionais e as nosas empresas para que estean preparados
para os empregos do futuro, e que “sexamos unha referencia na
formación de profesionais TIC e que as empresas non teñan
dificultade en contratar aqueles perfís que estean a buscar”.
O
equipo formador está integrado por Rubén Costa, Yago Pérez, Marcos
Martínez, Jose Mato, Pablo Rodríguez, Brais Rodríguez e Pilar
Varela. Arestora ofrécense á nosa comunidade de profesionais os
seguintes cursos: Programación fullstack a tempo completo
(bootcamp), Programación fullstack a tempo parcial (bootcamp)
e Curso de Product Manager (proximamente).
Segundo
engaden os impulsores acerca das metodoloxías docentes a pór en
práctica, os bootcamp de Hack a BOS consisten en cursos
intensivos de programación que adoitan durar entre 10 e 16 semanas e
que fornecen ao alumnado de todos os recursos precisos para programar
practicamente desde cero ou a partir de certo nivel. “Ao rematar
cada obradoiro, teremos o nivel de coñecemento axeitado para
permitirnos atopar emprego neste eido sen demasiada dificultade”,
explican.