En marcha a plataforma REDETAG para mellorar a competitividade do noso sector da conserva
venres, 3 de decembro do 2010
O
pasado 26 de novembro presentouse na sede de ANFACO-CECOPESCA (con simulacións
e demostracións incluídas) o proxecto REDETAG, unha iniciativa para optimizar a
competitividade das empresas ligadas ao sector conserveiro a través dunha
mellora, pola vía tecnolóxica, dos procesos de xestión, venda e promoción. A
plataforma, que vén da man das firmas CTI Consultores e Level Telecom (socias
de Ineo), permite o control dos diferentes
sistemas de trazabilidade, control de produción, aprovisionamento, vendas, loxística
“e outros procesos da cadea de valor para
as empresas do sector mar-industria de Galicia”, informa ANFACO-CECOPESCA.
O proxecto, do que xa falamos nesta web
hai uns meses, está xa finalizado e listo para ser empregado. Segundo informa a
asociación de conserveiros, trátase dun importante apoio para as nosas
empresas.
O
traballo que desprega REDETAG baséase na xestión de captura de datos en planta,
empregando tecnoloxías de radiofrecuencia (RFID) co obxectivo de coñecer a
cadea do proceso produtivo e xerar e validar un completo sistema de información
das propias factorías.
“O obxectivo que acadamos”, engade a dita
entidade empresarial, “é a posta en
funcionamento dunha solución informática común para as empresas do sector
transformador dos produtos da pesca, creando un núcleo integrador de xestión e
información na industria que é compatible cos sistemas dos que dispón arestora
a compañía”. Deste xeito, apunta, as empresas poderán integrar nas súas
instalacións unha ferramenta que abrangue tódolos procesos e de determinados
puntos de control.
Polo que atinxe ás responsabilidades de cada unha das entidades
participantes nesta iniciativa, que contou con financiamento da Secretaría
Xeral de Modernización e o Plan Avanza, dicir que ANFACO-CECOPESCA desenvolveu
as especificacións do sistema baseado nos procesos produtivos do sector
mar-industria; a empresa CTI Consultores, experta en consultoría de sistemas,
levou a cabo a creación, o desenvolvemento e a implantación física da
plataforma, e LEVEL Telecom, especialista na implantación de tecnoloxías TIC a
procesos, deseñou as solucións tecnolóxicas baseadas en RFID para o control dos
procesos produtivos e a súa vinculación á devandita plataforma.
Por
certo que na presentación de REDETAG no Campus de Vigo, onde está a sede de
ANFACO, participaron Juan Manuel Vieites, secretario xeral desta asociación, e
máis Jorge Cebreiros, presidente de Ineo e representante das dúas empresas que
traballan no proxecto.