Educación comproba o bo funcionamento da súa tecnoloxía para invidentes
martes, 27 de xullo do 2010
A Consellería
de Educación e Ordenación Universitaria, a través de varios representantes da
súa Dirección Xeral de Educación, Formación Profesional e Innovación Educativa,
achegouse onte ata o Centro de Recursos Educativo (CRE) en Pontevedra, onde, a
través dun Convenio de Cooperación Educativa para a atención das persoas con
discapacidade visual, colabora coa ONCE.
Durante a
visita ás instalacións do CRE, o director xeral de Educación, José Luis Mira, comprobou
de primeira man todo o equipamento tiflotécnico co que conta o centro, é dicir,
a tecnoloxía adaptada ás persoas con algún tipo de discapacidade visual que
mellora o seu día a día e axuda á súa integración na sociedade.
Os equipos
mixtos cos que conta o CRE galego contribúen na procura da normalización,
inclusión e plena autonomía do alumnado con discapacidade visual, así como das
súas familias, e permítelle acceder practicamente ás mesmas fontes de información
e ocio que o resto da cidadanía.
O representante
de educación estivo, asemade, no departamento de transcrición de libros de
texto en tinta ao sistema braille, dende o que se atenden as demandas dos
diferentes centros de Galicia.
Froito do devandito
Convenio de Cooperación Educativa da ONCE e Educación é posible a existencia de
equipos mixtos provinciais que suman un total de 20 mestres en Galicia, dos
cales 14 son aportados pola ONCE e 6 pola Consellería. Os equipos apoian ao
alumnado con discapacidade visual escolarizado en educación primaria e en 1º e
2º de secundaria, tanto en centros ordinarios como de ensinanza especial.
A Consellería
amosa así o seu compromiso coa ONCE, segundo afirman, “de garantir a atención das necesidades das persoas con discapacidade
visual, asegurando a súa formación, integración educativa e inserción na
sociedade”.