Comeza esta semana a xuntanza #NeThinking na Illa de San Simón
martes, 29 de marzo do 2011
Como comunicar ben cando hai sobrecarga de
información? Este é un dos grandes paradoxos dos nosos días, o de ter entre
mans unha Sociedade do Coñecemento que, de non manexala con tino, pode provocar
ignorancia a mans cheas. No caso da profesión de xornalista, os riscos son
claros: pásase de ter catro ou cinco fontes fiables a contar cun número
infinito delas, a meirande parte dubidosas. Asemade, espállase o uso do “curta
e pega”, un dos grandes males da comunicación actual. Poderiamos seguir, pero
este fin acáelle mellor ao encontro #NeThinking,
unha xuntanza da que xa falamos en Código
Cero hai uns cantos e días e que se celebrar na Illa de San Simón, na Ría
de Vigo, ao longo desta semana: dende o mércores 30 ao xoves 31.
O evento contará cun
número importante de especialistas en redes sociais e na Sociedade da
Información, sendo o seu obxectivo principal afondar nas oportunidades e nos
atrancos da revolución dos medios que estamos a vivir coa chegada das redes
sociais e outros servizos semellantes.
Xa nun eido máis concreto, a xuntanza
(integrada no programa Illa do Pensamento), contará co presenza de comunicadores
de primeira liña como Mario Tascón, que foi un dos responsables principais do éxito
de elmundo.es, Eva Hache, presentadora de TV, ou Nacho Vigalondo, director de
cinema. Pola banda galega, acudirá (entre outros) Javier Pedreira, Wicho (responsable do blog
Microsiervos). Tamén fará acto de presenza o líder de Siniestro Total, Julián
Hernández; ou Valentín Alejandro, profesor da Área de Comercialización e
Investigación de Mercados da Universidade da Coruña.