Castrosúa anuncia un investimento de máis de un millón de euros en I+D ao longo de 2014
xoves, 6 de febreiro do 2014
O grupo galego Castrosúa
anunciou hoxe que investirá máis de un millón de euros a longo de
2014 en materia de “modernización e renovación de equipos e en
melloras de produtividade”, algunhas delas moi relacionadas coas
aplicación de novas tecnoloxías no eido da seguridade na condución
e na busca de solucións intelixentes para o transporte. Estas
novidades foron dadas a coñecer por Juan Luis Castro Rodríguez,
presidente da compañía, como lembraremos centrada na fabricación
de carrozarías de autobuses e autocares. Segundo engadiu, a empresa
agarda facturar en 2014 máis de 40 millóns de euros e fabricar máis
de 300 vehículos.
Na súa intervención
ante os medios, o presidente da compañía amosou as liñas de acción
do seu plan estratéxico de cara a 2017: internacionalización e
fomento da I+D. Nun plano máis concreto, Castro lembrou que hai
poucos meses Castrosúa gañou un concurso para o subministración de
10 autobuses híbridos e 83 carrozarías urbanas de 12 metros de
lonxitude, que se distribuirán por diferentes cidades de Lituania. O
presidente do grupo tamén fixo saber que se vai intensificar a súa
colaboración con centros tecnolóxicos como o CTAG, co que Castrosúa
está a traballar no desenvolvemento dun posto de condución avanzada
e máis nun sistema de visión perimetral de vehículos. Segundo
engadiu Castro Rodríguez, “esta aposta polo desenvolvemento
tecnolóxico ten un claro obxectivo: aplicar a I+D a produtos
concretos que poidan comercializarse no mercado e situarse á
vangarda no desenvolvemento de solucións innovadoras para o sector”.
Lembrar tamén que
Castrosúa participa en proxectos como A2VISES (Aplicacións de
análise avanzada de vídeo para unha Smart City eficiente e segura),
cuxo obxectivo é o deseño e desenvolvemento dunha plataforma
avanzada de aplicacións de análises de vídeo e da seguinte
xeración de sistemas de xestión e gravación de vídeo orientado a
sistemas IP de vídeo vixilancia e control de accesos, para a súa
integración nunha cidade intelixente. O consorcio, liderado por
TRedess (do grupo Televés) está formado por Castrosúa, Quobis
Networks, Idom, Castrosúa e Sixtema. Ademais, participan arreo os
centros galegos de investigación Gradiant, CTAG e CITIC.