Carmela Silva lembra en Madrid a necesidade de garantir o acceso pleno ás TIC dende o rural
xoves, 31 de maio do 2018
A
presidenta
da Deputación de Pontevedra, Carmela Silva, participou onte na
cuarta edición do Congreso Cidades Intelixentes que se celebra até
hoxe en Madrid, da man da Secretaría de Estado para a Sociedade
da Información e a Axenda Dixital. Máis polo miúdo, a titular do
Goberno pontevedrés interveu (sendo a única presidenta dunha
deputación que participou) na mesa redonda O Plan nacional de
territorios intelixentes: unha oportunidade para o entorno rural.
Silva avogou na sesión por
acelerar os procesos de dixitalización e acompañar este labor de
medidas que garantan o acceso pleno ás novas tecnoloxías dende o
rural, en igualdade de condicións e de oportunidades. Este
compromiso coas áreas non urbanas, ademais, será un xeito de loitar
contra a despoboamento.
A
presidenta defendeu que “debe ser unha obriga para as
administracións que a poboación rural teña os mesmos dereitos e
servizos que aquelas persoas que viven nos núcleos urbanos e que
esta igualdade ten que vir do acceso as novas tecnoloxías que
evitarán o despoboamento das zonas de interior do país”.
Silva
tamén advertiu da necesidade de fornecer de recursos económicos os
traballos de dixitalización e transformación tecnolóxica que
atinxen ás entidades públicas e, por suposto, á cidadanía. Neste
senso, lembrou que a súa chegada á Deputación de Pontevedra, “só
cinco concellos tiñan implantada a Administración Electrónica” e
que a institución provincial “fixo un inxente esforzo para que na
actualidade, tres anos despois, os 61 concellos da provincia contan
con este servizo”. Isto, sinalou, complementouse con labores
acordes de capacitación: “Formamos a 2.324 funcionarios municipais
para que puideran adaptarse as esixencias da lei de Administración
Electrónica e neste intre somos a única provincia galega que conta
en todos os seus concellos con este servizo”.
Carmela
Silva tamén debullou os proxectos de servizos para dotar de sistemas
intelixentes os concellos da provincia, como a aplicación para a
obtención do padrón que xa ten 19 municipios adheridos e que
facilitan aos funcionarios da administración local e aos veciños e
veciñas a consulta e a obtención dos seus datos. Tamén informou do
servizo de impresión dixital centralizado que pon a disposición dos
concellos da provincia como un sistema de aforro e optimización de
servizos.
Xunto
á presidenta da Deputación, participaron na mesa redonda Eduardo
Gutiérrez, responsábel da oficina de Seguimento do Plan Nacional de
Cidades Intelixentes da SESIAD; Juan Manuel Fernández Ortega,
director xeral da Administración Local da Xunta de Andalucía;
Joaquín Palacín, director xeral de Ordenación do Territorio do
Goberno de Aragón e Isabel Bombal, vogal asesora da Dirección Xeral
de Desenvolvemento Rural e Política Forestal.