As vantaxes da Rede para o contribuínte, a debate nun curso no Campus de Ourense
xoves, 14 de xuño do 2012
Quen máis quen
menos xa probou as vantaxes da Rede en materia fiscal, en boa medida
a través de servizos novos como a posibilidade de solicitar e
confirmar borradores sen necesidade de achegármonos até as
dependencias físicas das administracións. Avaliar estas e outras
ferramentas da Axencia Tributaria, salientando vantaxes e atrancos, é
precisamente o obxectivo dunha
iniciativa que se vai desenvolver no Campus de Ourense entre os
días 22 e 29 de xuño: o curso de verán Fiscalidade
aplicada e Internet. Ao abeiro
desta actividade, entre outras cousas, avaliaranse polo miúdo as
ferramentas de balde que temos ao noso alcance para presentar a
declaración da renda.
Ou sexa, todos aqueles
programas informáticos, simuladores, documentos ou impresos,
dispoñibles nas webs das administracións, que teñen o obxectivo
último de facer máis fácil a tramitación de impostos para os
cidadáns e para as propias institucións. A idea do curso é, polo
tanto, tirarlles o máximo partido.
A iniciativa, que ten as
súas orixes en 2000 (ano dende o que se levan impartindo no Campus
de Ourense accións formativas ligadas á fiscalidade), vén da man
dos docentes do Departamento de Economía Aplicada da Universidade de
Vigo. A novidade está no compoñente TIC: “Se ben outros anos
ofrecíamos algunha sesión práctica cos programas de axudas para a
liquidación dos impostos, este ano apostamos por un curso centrado
no uso destas ferramentas”, explica Alberto Vaquero, director
do curso xunto ao docente Fidel Picos. E engade: “Todo o que
sexa axuda para o contribuínte benvida é, e no caso da liquidación
de impostos as ferramentas que hai en Internet son moi intuitivas e
fáciles de manexar para calquera persoa”.
Por certo que para os
coordinadores do curso é fundamental salientar as vantaxes do
programa PADRE, o que se emprega para liquidar as obrigas tributarias
do Imposto da Renda das Persoas Físicas (IRPF). Tamén recomendan a
familiarización co programa de cálculo das retencións das rendas
do traballo da Axencia Estatal da Administración Tributaria; co
programa do Imposto sobre Sociedades e o Imposto sobre a Renda de non
Residentes e co programa de axuda para a Liquidación do Imposto de
Sucesións (ALIS), este dispoñíbel na web da Consellería de
Facenda.