As familias pontevedresas xa poden tirar proveito da plataforma Trocalibros
xoves, 4 de xullo do 2019
A
cidadanía de Pontevedra que queira darlle unha nova vida aos libros
escolares esquecidos nos andeis, ou tirar partido dos desbotados
noutros fogares, pode facelo a través da plataforma
Trocalibros.pontevedra.gal,
que vén de ser activada coincidindo co remate do curso escolar e,
polo tanto, co inicio dos trámites nas familias para o comezo do
seguinte.
Neste
senso, o Concello quere que a ferramenta tecnolóxica sexa un recurso
de utilidade para favorecer o intercambio de manuais escolares con
vistas ao vindeiro inicio das clases. “Con este programa damos
resposta ás familias que se atopen nunha situación difícil”,
comentou a concelleira de Benestar Social, Paloma Castro.
Segundo
fixo saber, o manexo é sinxelo: as familias deben facerse
usuarios/as da plataforma e logo encher no sistema os libros que
ofrecen e os libros que solicitan. Se eses libros foron ofrecidos por
algunha familia o sistema lle facilita os datos de contacto.
A
operatividade de Trocalibros.pontevedra.gal
insírese no compromiso do Goberno local por promover espazos
colaborativos e contribuír a xerar un modelo de desenvolvemento
sustentábel dende a perspectiva económica, ecolóxica e social.
“Este é o obxectivo deste proxecto de reutilización dos libros de
texto, que ademais pretende dar resposta no ámbito educativo a
familias pontevedresas que se atopan nunha situación difícil”,
indicou a concelleira.