Arrinca a nova edición de Inspira STEAM A Coruña, co que colabora o CITIC
venres, 13 de xaneiro do 2023
O
CITIC
(Centro de Investigación TIC) da Universidade da Coruña colabora
cunha nova edición do programa Inspira STEAM, promovido pola
Universidade de Deusto e coordinado na Coruña pola investigadora do
CITIC Verónica Bolón. O programa ten a finalidade de fomentar as
vocacións científico-tecnolóxicas entre estudantes, poñendo o
foco nas nenas e con vistas a incrementar a súa futura presenza no
ámbito da investigación.
A
nova edición dará comezo o próximo 19 de xaneiro cunha xornada
formativa en liña de cinco horas de duración destinadas a mentoras
e mentores do ámbito académico, empresarial e da investigación. A
formación será impartida por Ander Mimenza Aurrecoechea, formador e
consultor especializado en desenvolvemento organizacional e de
persoas. O CITIC explica que unha vez realizada a xornada formativa
desenvolveranse seis sesións de traballo en centros educativos de
ensino primario da provincia da Coruña cos obxectivos de “facilitar
ao alumnado referentes de mulleres científicas e tecnólogas, dar a
coñecer as profesións STEAM, sensibilizar e orientar sobre os
estudos en ciencia e tecnoloxía, reivindicar as mulleres STEAM da
historia, así como dar a coñecer os estereotipos existentes nestas
áreas para que non condicionen as decisións de nenas e nenos”.
Esta
edición do programa tamén contará coa colaboración da cátedra
NTT Data e o Colexio Profesional de Enxeñaría Informática de
Galicia (CPEIG).