Arantia lanza máis datos sobre a súa plataforma: sería a entrada á era dixital que procurabamos

Segundo nos apunta nunha entrevista Jacobo Penide (na imaxe), director xeral de Arantia, se tivésemos que definir cun adxectivo o servizo Arantia World (do que falamos polo miúdo a semana pasada) non andariamos desencamiñados no caso de elixir o seguinte termo: simple. De feito, esta plataforma encamíñase a dous obxectivos principais e complementarios. Primeiro: integrar a Rede e a televisión dixital para crear nos fogares un centro de lecer multimedia (converxencia). Segundo: facelo sinxelo.
Só así, engade Penide, unificando e simplificando, pode chegar a era dixital a calquera cidadán e abrindo, a maiores, un amplo panorama de posibilidades de entretemento, acceso á información e mellora na calidade de vida. Neste sento en concreto, Penide é ben claro: Arantia World mesmo pode axudar ás persoas maiores a estar máis en contacto co mundo e a ter mellores servizos de atención.
Máis polo miúdo, sinalar que esta plataforma cen por cen galega converte a nosa casa nun espazo do lecer onde todos os dispositivos están conectados e, tamén, nunha potente rede de redes, sendo preciso só contar con dous requisitos: un aparello de televisión e unha conexión a Internet.
-Cara a que tipo de público se dirixe Arantia World? Supoñemos que unha persoa do rural que non teña un bo acceso a Internet non poderá gozar do servizo? Pero se ten un bo acceso (tipo Wimax, por exemplo, que se está a espallar pola nosa xeografía) si?
-A plataforma Arantia World foi deseñada impoñendo como requisito imprescindible a simplicidade. Isto implica que as aplicacións e servizos dispoñibles son facilmente empregables por calquera tipo de persoa, con independencia da súa idade, incluíndo mozos e mozas e persoas maiores, para os que cales (estes últimos) ábrese ademais todo un abano de posibilidades de servizos que permitan mellorar a calidade de vida no fogar.
Para o acceso ó sistema é preciso un televisor e unha conexión á Rede. É posible que existan determinadas zonas con amplitude de banda máis limitada, pero neste caso as aplicacións e servizos poderán adaptarse en función da capacidade de conexión.
No caso de Galicia, debemos salientar de maneira especial os esforzos públicos e privados por levar a banda ampla a todo o rural, de aí que esteamos convencidos de que esta solución será potencialmente aplicable a todos os fogares nu curto prazo.
-Cara a onde pretende chegar Arantia con este servizo xeograficamente falando? Alén do mercado galego e español?
-Arantia nace con vocación internacional, levando a tecnoloxía desenvolvida en Galicia alén das nosas fronteiras, sendo proba disto a posta en marcha de proxectos de gran importancia en Portugal, Francia, Italia, Reino Unido e o Oriente Medio. Neste senso, a estratexia de lanzamento para este produto arrancará no mercado nacional, para rapidamente espallalo ós mercados internacionais.
-Na presentación falaches de que Arantia World converte o fogar nunha “potente rede de redes”. A que vos referides con isto? Significa que teremos unha Internet no fogar?
-Este é un concepto absolutamente innovador desta plataforma a nivel mundial e que marca a diferenza. O Home Digital Center fai realidade o concepto Any Wire, calquera rede de casa, incluíndo o fío da antena, a rede eléctrica ou a liña telefónica, serve para intercomunicar os dispositivos domésticos, o PC coa televisión ou con calquera outro elemento da casa. O fogar pasa deste xeito a dispor dunha potente “rede de redes” onde a comunicación deixa de ser un atranco. Sen dúbida, isto supón o futuro do fogar dixital feito realidade.
-Cales credes que van ser os contidos que máis lles interesen ós galegos e galegas?
-Pensamos que o lecer e a seguridade serán os contidos en boa medida demandados polos usuarios. O concepto de televisión personalizada, onde o espectador decide o que quere ver e cando o quere ver, engade infinitas posibilidades de elección, xa que é posible ver un filme ou unha serie, acceder a Internet, intercambiar información con outros usuarios e todo iso do xeito máis rápido e sinxelo a través do televisor.
-Polo que podemos deducir, Arantia World pode ser un bo xeito de reducir o número de portas de acceso á era dixital. O número de portas e tamén o de aparellos e tecnoloxías diversas. Unides Rede e televisión e algunha que outra cousa máis nunha mesma cousa. Pode ser isto un bo xeito de facilitar o acceso á Sociedade do Coñecemento?
-A entrada no fogar significa a culminación da nosa estratexia como compañía para crear innovacións tecnolóxicas que sexan quen de liderar a converxencia da televisión dixital, Internet e o acceso a contidos baixo demanda e servizos interactivos. A palabra clave é sen dúbida, a converxencia, de maneira que coa incorporación desta plataforma nos fogares intégranse nun único dispositivo todos os elementos multimedia da vivenda, facilitando o rápido acceso de calquera usuario ás novas tecnoloxías e estendendo a todos os niveis a Sociedade do Coñecemento.