Apple Music bota a andar permitindo probar de balde o servizo durante 3 meses

Esta tarde Apple estreou iOS 8.4, nova versión do seu sistema operativo que como principal novidade modificada a aplicación de reprodución musical dos dispositivos móbiles de Apple para integrarlle o novo servizo Apple Music, que tamén botou a andar hoxe inicialmente só para dispositivos de Apple ou equipos con última versión de iTunes, para chegar no outono tamén a Android.
Este novo servizo vén a ser un competidor de Spotify, pois permite o acceso a millóns de temas musicais de pagarmos unha cota mensual de 9,99 euros (existindo tamén unha cota familiar de 14,99 euros), e para animar a xente a catar esta nova plataforma musical é posible subscribirse ao mesmo sen pagar os 3 primeiros meses. Cómpre lembrar que neste caso o sistema configúrase para a renovación automática do servizo, sendo recomendable desactivar tal opción para poder tomar tal decisión dun xeito proactivo e non accidental.

A estrea de AC/DC no mundo do streaming musical coincidiu co lanzamento de Apple Music

O servizo non só conta cun completo catálogo musica que podemos escoitar en liña, senón que tamén inclúe as típicas opcións de reprodución fóra de liña, resultando un tanto confuso o detalle de que conta cunha funcionalidade semellante a iTunes Match (permite a integración na nube de Apple da música que teñamos pese a non estar incluída no catálogo de Apple Music.
Para potenciar o uso desta plataforma inclúese un sistema de recomendacións nas que boa parte da selección musical está elaborada por persoas (para o que o sistema realízanos unha especie de enquisa sobre os nosos gustos), o que é unha das grandes apostas de Apple xunto con Beats 1, unha radio musical en liña que tamén botou a andar esta tarde, e que suscita bastante interese (aínda que as súas primeiras horas deixan claro que se trata dunha emisora virtual orientada a un público norteamericano).
Para completar o servizo tamén está Connect, unha capa social que pretende axudar a comunicar aos artistas cos seus seareiros, aínda que non parece haber moita confianza en que esta funcionalidade vaia gozar de aceptación (especialmente polos fallos anteriores de Apple ao respecto).