Amplíase o prazo de axudas para levar a banda larga ultrarrápida ás empresas e autónomos máis afastados
mércores, 19 de abril do 2017
Para quen non o saiba, aínda a estas alturas, existen recursos de
apoio dos que podemos botar man para ter unha boa conexión á Rede
aínda que vivamos e traballemos en zonas rurais afastadas, zonas
próximas a seren cualificadas de “áreas de sombra dixital”.
Estes recursos, dirixidos a empresas e autónomos, están a ser
postos en xogo pola Axencia para a Modernización Tecnolóxica de
Galicia (AMTEGA) e consisten en axudas para dotar a quen traballe nas
ditas contornas de banda larga ultrarrápida. O prazo para solicitar
estes apoios xa debera estar pechado ou a piques de pecharse, pero
a axencia que dirixe Mar Pereira vén de amplialo en tres semanas
para abranguer a meirande cantidade de profesionais e empresas.
Con esta modificación da convocatoria, que se publica hoxe no Diario
Oficial de Galicia, a axencia posibilita a presentación das
solicitudes até o vindeiro 11 de maio.
O
orzamento que se fai dispoñíbel ao abeiro destes apoios é de
500.000 euros, que se poderá ampliar ata un máximo de 1 millón de
euros, en función da demanda. Segundo ten informado AMTEGA, as
axudas subvencionarán ata o 100% dos custos das tarefas necesarias
para dotar de banda larga ultrarrápida á empresa, até un máximo
de 20.000€ por beneficiario (porén, os proxectos deberán ter un
custo mínimo de 2.000 euros).
Estas
subvencións cofináncianse ao 75% polo Fondo Europeo Agrícola de
Desenvolvemento Rural (FEADER) no marco do Plan de desenvolvemento
rural de Galicia 2014-2020 (PDR).
Os
principais requirimentos e obrigas que deberán cumprir os
solicitantes serán non dispoñer a día de hoxe da posibilidade de
acceso a redes ultrarrápidas de cando menos 30 Mbps e manter a alta
no servizo contratado inicialmente durante cando menos 1 ano. Segundo
explica AMTEGA nas bases, “para cada solicitude valorarase a
mellora que supón o servizo de banda larga ultrarrápida incluído
na proposta, o esforzo inversor previsto e valoraranse tamén as
solicitudes recibidas das pequenas empresas”.
Esta
actuación é a segunda liña de actividade do Plan de Banda Larga de
Galicia 2020, que en xullo de 2016 puxo en marcha unha primeira folla
de ruta para conectar 81 polígonos industriais das catro provincias
galegas a redes de ata 350 Mbps, que non contan con cobertura de
redes ultrarrápidas nin previsión de dispoñer deste servizo.
En 2016
completouse o despregue en 17 polígonos.
En 2017 cubriranse outros 30 e en 2018 os 34 restantes. A
previsión de AMTEGA é de que en 2018 un total de 130
polígonos, “nos que se concentra case o 93% da superficie
empresarial ocupada”, disporán de acceso a redes de máis de 100
Mpbs.