Amparo Alonso falará este mércores sobre IA e sustentabilidade ao alumnado da Cátedra Inditex-UDC

A investigadora do CITIC da Universidade da Coruña, Amparo Alonso, impartirá este mércores 10 de abril unha charla dentro Curso de Especialización en Sustentabilidade Social (CESIS) da Cátedra Inditex-UDC de Sustentabilidade. No seu relatorio, que terá lugar na Facultade de Economía e Empresa da Universidade da Coruña (Campus de Elviña), de 16.00 a 17.30 horas, Amparo Alonso introducirá ao alumnado de posgrao en temas referidos á sustentabilidade en IA.
Amparo Alonso e o seu equipo do CITIC desenvolven parte do seu traballo sobre a base da denominada Intelixencia Artificial verde, unha liña de traballo que se está impulsando desde diferentes grupos do centro coruñés en sintonía co Plan Nacional de Algoritmos Verdes do Goberno. Para contextualizar esta charla, cómpre lembrar que a IA aplicada aos algoritmos verdes é un conxunto de sistemas cuxa meta é interpretar todos os datos dunha entidade e traducilos do xeito máis sustentábel e responsábel e menos contaminante para o planeta. Seguindo este fío, hai dúas formas de aplicar este tipo de algoritmos: Green in AI, algoritmos que se crean de forma sostíbel, que consumen menos recursos na súa xestación e que conseguen o mesmo resultado e Green by AI, algoritmos que xeran un impacto sustentábel.