Amparo Alonso e Bertha Guijarro (CITIC) participan na fundación da Sociedad Española de Inteligencia Artificial en Biomedicina

Amparo Alonso nunha imaxe de Xurxo Lobato

As investigadoras do Centro de Investigación en TIC (CITIC) da Universidade da Coruña Amparo Alonso e Bertha Guijarro forman parte do equipo fundador da recentemente creada Sociedad Española de Inteligencia Artificial en Biomedicina (IABiomed). Trátase dunha entidade que ten como obxectivo “fomentar a investigación e o desenvolvemento da IA aplicada a biomedicina, un área onde as tecnoloxías intelixentes están a ter gran transcendencia”.

A entidade xorde ao abeiro da Red Temática sobre IA en Biomedicina creada en 2018, da que o grupo de investigación LIDIA da UDC, dirixido por Amparo Alonso e representado na rede por Bertha Guijarro, tamén formaba parte, e que foi o xerme desta colaboración científica estatal.

“A Intelixencia Artificial ten aplicacións cada vez máis amplas en biomedicina, incluíndo a investigación médica, o diagnóstico de doenzas, a medicina personalizada e a atención ao paciente. Por iso, parécenos moi relevante a creación desta sociedade, que é unha ferramenta de enorme potencial xa que fomenta a colaboración entre profesionais de diferentes áreas” sinalaron as investigadoras do CITIC e co-fundadoras da entidade.

A invesigadora do CITIC da UDC, Bertha Guijarro

A entidade está integrada por 42 investigadores de 16 provincias españolas e busca a promoción da colaboración na actividade científica así como a investigación multidisciplinar na área de IA en biomedicina. Así mesmo, tamén quere promover actuacións que permitan xerar recursos de interese para a divulgación, a investigación e a formación neste ámbito. De feito, un dos obxectivos de IABiomed é establecer vínculos e sinerxías con empresas e organismos públicos e privados que se poidan beneficiar de maneira directa e indirecta das actividades e aplicacións da IA no eido da biomedicina.

Así mesmo, a Sociedade é consciente dos desafíos presentes e futuros aos que debe facer fronte no campo da biomedicina, polo tanto, os esforzos de IABiomed irán principalmente destinados a atopar solucións para eses retos, tales como o acceso aos datos de saúde con fines de investigación, a falla de tratamentos para enfermidades raras, os problemas derivados da resistencia aos antibióticos, novas pandemias ou a mellora dos procesos clínicos.

A información detallada desta redes pode consultarse na súa páxina web www.iabiomed.org.