Amparo Alonso coordina os VI Premios Stephen Hawking que se entregan este venres en Santiago

Este venres entréganse no IES Rosalía de Castro de Santiago os VI Premios Stephen Hawking, que contan co patrocinio da empresa láctea FEIRACO e están a ser coordinados pola catedrática da UDC e investigadora do Centro de Investigación TIC (CITIC) Amparo Alonso. Trátase duns galardóns que teñen como obxectivo difundir a cultura científica e estimular a vocación investigadora entre o alumnado de Bacharelato. Participan 54 traballos presentados por estudantes de once institutos: nove galegos, un de Soria e outro de Madrid.
O certame, coordinado por Amparo Alonso Betanzos (Vigo, 1961), catedrática de Ciencias da Computación e Intelixencia Artificial da Universidade da Coruña, foi convocado polo IES Rosalía de Castro e conta coa colaboración da Consellería de Educación, Ciencia, Universidades e Formación Profesional, FEIRACO, FINSA e Ternera Gallega.
Os traballos concorrentes xiran en torno a dous eixos: a figura de Amparo Alonso Betanzos e a súa contribución á Intelixencia Artificial; e a lenda desta edición: Intelixencias. Iso significa que os traballos presentados teñen que estar vencellados aos campos da bioloxía e xeoloxía, da física e a química, das matemáticas, do ámbito tecnolóxico, das ciencias sociais ou de índole artística.
Os traballos serán presentados diante do xurado nos laboratorios de bioloxía e física do IES Rosalía de Castro entre as 9:30 e as 13:30 horas, a razón de 10 minutos por traballo máis outros cinco de debate. Os premios serán entregados ás 19:00 horas no salón de actos do instituto compostelán, cunha conferencia de Amparo Alonso Betanzos e cun cóctel con produtos de FEIRACO.
Os centros participantes nos VI Premios Stephen Hawking son: IES Arcebispo Xelmírez II e IES Rosalía de Castro (Santiago de Compostela), IES Brión (Brión, A Coruña), IES Eusebio da Guarda (A Coruña), IES Lucus Augusti e IES Nosa Señora dos Ollos Grandes (Lugo), IES Blanco Amor (Ourense), IES Xermán Ancochea Quevedo (Pobra de Trives, Ourense), IES Val Miñor (Nigrán, Pontevedra), IES Castilla (Soria) e IES Ramiro de Maeztu (Madrid).