Altia participa na creación das Residencias Dixitais de Castela e León
xoves, 29 de xullo do 2021
A
empresa
galega Altia vén de participar nun proxecto da Xunta de Castela e
León para a creación das denominadas Residencias Dixitais. No
primeiro piloto da iniciativa, a firma con sede principal en Oleiros
responsabilizouse da Oficina Técnica do Proxecto e, subcontratados
por parte de Datio Software, nos pilotos de vídeo-conferencia e
control de errantes.
Estes
traballos forman parte dun proxecto impulsado polo departamento de
Familia e Igualdad de Oportunidades da Junta, que conta cun
investimento de 4,8 millóns de euros e que se dirixe á
dixitalización de toda a rede autonómica de centros públicos de
atención a persoas maiores, con discapacidade e dependencia; centros
de día e de menores, e das unidades de valoración e atención a
persoas con discapacidade e dependencia. O obxectivo último é
“reforzar a protección das persoas máis vulnerábeis e mellorar o
seu benestar e a súa calidade de vida”.
Os
primeiros pasos na execución desta iniciativa déronse a principios
do pasado ano coa instalación de redes Wi-Fi nos primeiros 38
centros de maiores e de persoas con discapacidade, co fin de dotalos
de conectividade (facilitando servizos como por exemplo a
vídeo-conferencia, de gran utilidade durante os meses de
confinamento) e mellorar a colaboración entre centros (ao ligárense
os sistemas de xestión dos mesmos a través de conexión sen fíos).
Completado
este primeiro trámite, o segundo é a aplicación desta tecnoloxía
a novas funcionalidades. Neste contexto, a residencia de maiores de
Benavente é o lugar elixido para o desenvolvemento de dous proxectos
piloto, que a Junta prevé ampliar a toda a súa rede de centros
públicos.
O
sistema de seguimento de persoas con problemas de orientación de
Altia permite facer seguimento permanente, a través das redes sen
fíos, da posición dos usuarios, fundamentalmente en contornas
críticas como as zonas de saída ou outras que poidan entrañar
perigo para a integridade dos residentes. O software posibilita unha
xestión case en tempo real e de maneira centralizada dos avisos ao
persoal do centro, alarmas, control de portas e a activación dos
protocolos que se consideren oportunos.
O
segundo proxecto piloto que xa se está probando en Benavente é unha
plataforma para estender a rede interna da Junta e conectar os
sistemas de xestión da propia residencia e os de saúde. Isto fará
posíbel a teleconsulta.