Ábrese o proceso de votación para os primeiros Premios LaconNetwork
luns, 25 de xaneiro do 2016
Como avanzamos
a semana pasada, o vindeiro venres celebrarase o 6º aniversario da
LaconNetwork, serie de encontros de emprendedores e profesionais do sector TIC
galego que se celebran mensualmente, e que unha vez ao ano buscan conseguir
unha proxección especial con encontros a maior escala, acompañando o seu xantar-networking con algunha charla e
mesa de debate, e que nesta nova edición irá un paso máis aló, estreando a
primeira edición dos seus propios premios.
O evento deste ano estará presentado polo xornalista Fran Hermida, quen
conducirá as distintas entregas de premios e as intervencións que irán
desenvolvéndose entre as 9:00 e as 14:00 horas, antes de dar paso ao xantar, e
finalmente xa se coñecen algúns detalles que eran toda unha incógnita a semana
pasada, como o feito de que a charla maxistral prevista para as 12:45 horas
correrá da man de Sixto Arias (Made in Mobile), todo un emprendedor en serie que participou en
proxecto como Movislisto, Mobext e Made in Mobile. Arias axuda a outros
emprendedores investindo como business
angel, impartindo formación e asesorando como voluntario en diversos
organismos.
No que se refire aos primeiros
Premios LaconNetwork, veñen de abrirse as votacións para tres das súas
categorías: optan ao premio Lacon Iniciativa as entidades
ViaGalicia, Clúster TIC, Círculo de Empresarios de Galicia e Galicia
OpenFuture; para o Premio Lacon Evangelizador figuran como
finalistas Camilo Ameijeiras, Jacobo García-Durán, Agustín Tourón e Marcus
Fernández; e optan ao Premio Lacon Angel Investidor Juan Güell
(Círculo de Empresarios de Galicia), Dani Seijo (Civeta Investment), Antón
Chaver (Grachav Invest) e Patricia García e José Dafonte (Grupo Femxa).
Os interesados en participar nesta LaconNetwork poden xa inscribirse en liña,
tendo a entrada para o evento un prezo de 25 euros, existindo tamén unha modalidade
de entrada cun prezo de 40 euros que incluiría unha camiseta conmemorativa.