A tecnoloxía galega ponse ao servizo do transporte de mercancías
mércores, 20 de xullo do 2011
Ao longo dos seus máis de 14 anos de experiencia no desenvolvemento de solucións tecnolóxicas á medida, foron moitos os clientes (máis de 900) que confiaron no bo facer da galega Ayco, unha das firmas punteiras do Estado na xestión de proxectos de I+D+i.
Unha das primeiras compañías do seu sector en incorporar tecnoloxía de Ayco foi Transportes Pellejero e Hijos, empresa con máis de 40 anos de experiencia no transporte de mercancías, que confiou no bolígrafo dixital Black Pen, un sistema de xestión de información da compañía, que permite dixitalizar e enviar en tempo real os albaráns dos seus transportes, completando en poucos minutos procesos administrativos que antes, segundo indican, “levaban varias xornadas de traballo”.
Deste xeito, dende que se cumprimenta o albarán ata que se incorpora ao sistema de xestión da central apenas transcorren uns minutos, un proceso que sen o Plack Pen levaría varias xornadas de procesado e tramitación.
Os responsables da firma de transportes afirman ter apostado polo I+D “para reducir os procesos administrativos, axilizar a facturación e dispor de información en tempo real sobre o estado dos envíos”, tarefas que a tecnoloxía que acaban de incorporar axiliza notablemente.
Asemade, o bolígrafo dixital mellora a xestión da información, evita a perda de datos, axiliza o proceso de facturación e establece un control en tempo real do estado dos envíos, algo que o xefe de Tráfico de Transportes Pellejero e Hijos, Diego Pellejero, salienta como moi favorable.
“Antes de empregar este sistema, dúas persoas tiñan que desprazarse a diario ata os diferentes puntos de descanso dos nosos camións para recoller en man os albaráns da xornada e unha vez na oficina investir varias horas introducindo os datos de tódolos albaráns no noso sistema de xestión”, indica Pellejero; “coa tecnoloxía Black Pen, este proceso automatízase, e se antes se demoraba durante varias xornadas de traballo, agora pode durar tan só uns minutos”, afirma.
Outra das novidades en innovación incorporadas por Transportes Pellejero e Hijos é a instalación (en tódolos seus vehículos dedicados ao transporte de mercancías xerais) dunha impresora térmica conectada a un dispositivo Blackberry, que lle permite ao transportista levar consigo un documento de control con información relevante sobre o transporte (data e lugar de carga, destino, tipo de mercancía, identificación do cliente...).
Coa incorporación desta tecnoloxía, a empresa pode garantir en todo momento que cada transporte realizado vai acompañado do documento de control, e que a información que nel se recolle é correcta, cumprindo así coa lexislación vixente.