A sala Normal da UDC acolle unha exposición dun proxecto de investigadores do CITIC
luns, 23 de decembro do 2019
A
sala Normal, o espazo de intervención cultural da Universidade da
Coruña, acolle estes días unha exposición destinada ao
electromagnetismo e a un proxecto de detección de pegadas indutivas
realizado por catro investigadoras e investigadores do Centro de
Investigación TIC (CITIC): Paula Castro, Adriana Dapena, José Lamas
e Francisco Vázquez. A
iniciativa, baixo o título Divulgando o noso, conta coa
colaboración da Unidade de Divulgación Científica da UDC e a
Deputación da Coruña.
Esta
iniciativa ten “o obxectivo de difundir ao público os contidos dos
proxectos de investigación a través de exposicións, obradoiros,
etc. para contribuír a mellorar a cultura científica da sociedade e
a percepción que a cidadanía ten do labor dos investigadores da
UDC”.
Na
mostra expóñense ademais os detalles do proxecto Pegadas
indutivas, unha iniciativa de investigación de control de
tráfico vehicular intelixente desenvolvido por investigadores do
CITIC. Baséase no fenómeno físico da indución electromagnética
para deseñar detectores de pegadas de vehículos nas estradas,
empregando bobinas incrustadas na calzada e un sistema electrónico
de medida e rexistro. As pegadas indutivas rexistradas permiten
identificar o tipo de vehículo, estimar a súa velocidade e
determinar o grao de ocupación da vía.
Ademais,
estas mostras van acompañadas dunha oferta de obradoiros destinados
a diferentes idades e ao público en xeral. Son de balde previa
inscrición a través do correo divulgacion.vepeu@udc.gal. A
programación é a seguinte:
·
Infantil (6-12 anos): 22 de xaneiro, de 17:30 h a 18:30 h (10 prazas)
e de 18:45 h a 19:45 h (10 prazas).
·
Adultos: 24 de xaneiro de 11:00 h a 12:00 h (20 prazas).