A plataforma Innopharma (USC) incrementa as súas capacidades grazas a unha achega de GAIN
venres, 29 de setembro do 2023
A
plataforma de descubrimento de fármacos Innopharma,
liderada dende o CiMUS da USC polos investigadores Mabel Loza e Ángel
Carracedo, incrementou a súa capacidade e competitividade
internacional logo
da dotación de cinco millóns realizada pola Axencia Galega de
Innovación (GAIN) da Xunta de Galicia nos últimos tres anos a
través do Fondo REACT-UE do Programa Operativo FEDER Galicia
2014-2020.
“Con
este financiamento, Innopharma poderá continuar cumprindo co seu
obxectivo de contribuír a que novos fármacos cheguen a pacientes,
ofrecendo aos grupos de investigación biomédica do Sistema
Universitario Galego e dos Institutos de Investigación Sanitaria,
así como á comunidade científica en xeral o seu apoio na xeración
de produto e servizos orientados á saúde”, indicou Mabel Loza
durante o acto de presentación desta ampliación, celebrado este
venres 29 de setembro. A xornada celebrouse nun encontro presidido
pola vicerreitora de Política Científica, Pilar Bermejo, e na que
tamén interviñeron a directora de GAIN, Patricia Argerey; o
representante da empresa ABAC Therapeutics, Domingo Gargallo, e os
coordinadores do proxecto, Ángel Carracedo e Mabel Loza.
Segundo
explicaron, o financiamento recibido “permitirá adquirir e
actualizar o equipamento científico-técnico do proxecto; contratar
persoal especializado no manexo das novas tecnoloxías e acondicionar
as instalacións ao novo equipamento”.
Loza
e Carracedo fixeron saber que os fondos recibidos permiten ampliar as
metodoloxías e tecnoloxías automatizadas compatibles con tratamento
por Big Data (análise de información a
gran escala), coa finalidade “de aumentar a capacidade do sistema
de I+D+i galego para o descubrimento temperá e desenvolvemento de
fármacos en Galicia, así como fornecer o sistema sanitario galego
con dotacións necesarias para acelerar estes procesos”.
Esta
plataforma ERIC de farmaco-xenómica da USC permite a captación de
proxectos internacionais e desempeña un papel relevante no
desenvolvemento de tecnoloxías traslacionais automatizadas con
infraestruturas de investigación de vangarda.