A nova Pont-Up Store recibiu un 50% de candidaturas máis que en 2018
martes, 11 de xuño do 2019
As
entidades impulsoras do
encontro de emprendemento Pont-Up Store, destinado a situar
Pontevedra no epicentro galego e estatal das enerxías aplicadas á
innovación, presentaron hoxe (oficialmente) a nova edición do
evento, baixo un lema que fala por si só da importancia que xogan no
acontecemento as emprendedoras e emprendedores visionarias/os: O
impulso da xente valente. Entre as novidades principais da nova
convocatoria figuran as seguintes: unha romaría creativa, un recanto
adicado ao emprendemento senior, un laboratorio rural de creación de
proxectos e, segundo fixo saber a organización, “unha manchea de
iniciativas arredor da industria dos videoxogos”.
Tamén
se fixo saber que a sexta edición da Pont-Up Store desenvolverase os
días 19, 20 e 21 de setembro na praza de España de Pontevedra e que
este ano a participación será máis relevante ca nunca: xa se
recibiron un 50% máis de candidaturas de iniciativas innovadoras có
ano pasado.
Na
presentación participaron o concelleiro de Normalización
Lingüística e Xuventude, Alberto Oubiña, o responsábel de
Economía da Deputación de Pontevedra, Carlos López Font; o
vicerreitor do Campus de Pontevedra, Jorge Soto; e o director da
feira, Pedro Figueroa.
Segundo
informaron, dende o pasado 30 de maio está aberto o prazo para
presentar candidaturas e participar na 6ª edición deste encontro,
que “aposta por sacar o emprendemento á rúa” e que este ano
volve propoñer tres modalidades de participación: presentar un
proxecto innovador nunha das 35 casetas gratuítas dispoñíbeis;
propoñer actividades de demostrativas dentro do programa; e
participar no Puntazo Exprés (no que 10 empresas serán
seleccionadas para explicar en 5 minutos o seu emprendemento a
representantes de importantes empresas e entidades galegas).
Nesta
edición contarase co apoio das firmas EDISA, Hifas da Terra, Roi
Scroll e Casa Grande de Xanceda.
As
candidaturas pódense presentar a unha ou varias modalidades até o 7
de xullo a través da web www.pontupstore.com.
A decisión do comité organizador farase pública o 23 de xullo.
Pedro
Figueroa explicou que “até o de agora recibíronse 49 candidaturas
procedentes dun total de 31 empresas, o que significa un crecemento
do 50% con respecto á edición anterior”. Amais, engadiu, un 60%
das solicitudes recibidas son proxectos radicados nas cidades e hai
un 40% de empresas con base no rural que sorprenden con propostas
baseadas na tecnoloxía.
Polo
que respecta á campaña deste ano (O impulso da xente valente),
quere poñer en valor “o risco que asumen as persoas que deciden
emprender para agradecerlles a valentía de apostar por unha idea,
entregando o seu tempo e o seu esforzo para facer realidade proxectos
que tantas veces contribúen a mellorar a vida da nosa sociedade”.
A imaxe da campaña é obra da ilustradora galega Iria Prol.
Como
dixemos, o evento vai poñer o foco no eido dos videoxogos,
amplificando algunha das actividades xa iniciadas en edicións
previas. Haberá, con respecto ao ano pasado, máis espazos de
exposición onde os visitantes poderán conversar con profesionais do
sector, meirande número de obradoiros de formación e charlas, e
competicións de eSports nas plataformas máis concorridas.
Todo isto formará parte desta edición do Espazo Gaming Pont-Up
Store 2019. Asemade, presentarase o evento Pont-Up Hobbypont 2019 by
Hobbycon, unha actividade rebordante de videoxogos, animación,
cómics e xogos de mesa, entre outras vertentes do lecer.
O
Pont-Up Store está liderado polo Campus Crea de Pontevedra
(Universidade de Vigo) co apoio do Concello local como patrocinador
principal, e é froito da cooperación de case 40 entidades públicas
e privadas que durante seis anos foron sumándose como patrocinadores
ou colaboradores, co obxectivo común de converter Pontevedra “na
capital galega das mellores iniciativas empresariais”. Este ano,
súmanse a este gran equipo FINSA, Gadis, AEMPE e a Secretaría Xeral
de Igualdade.
Galician
Rural Lab
No
marco da nova edición da feira, a emprendedora Alba Sotelo vai
presentar unha experiencia de desenvolvemento rural orientada á
formación audiovisual na que se inclúe a gravación dun programa de
radio en directo durante o evento e un proxecto de podcast
arredor de iniciativas de emprendemento. Ademais, no Espazo Fab Lab
desenvolveranse obradoiros de stop motion para nenas e nenos
de 1 a 12 anos; e unha charla educativa para pais, nais, titores e
titoras, sobre o uso das tecnoloxías nas xeracións nativas
dixitais.
Amais,
no Espazo de Economía Social e Creativa vaise organizar unha cata de
ideas arredor do proxecto Interrreg Va-Laces; un mural de co-creación
baseado nunha economía con valores sociais e responsábeis; e unha
xuntanza de empresas culturais e creativas que traballan desde
fórmulas de emprendemento social. Tamén se convocarán, como cada
ano, os encontros anuais de distintas entidades do ecosistema
emprendedor como Espazocoop, A Redeira, AJE Galicia, Wordpress ou
Mulleres Atlánticas.