A UVigo presenta un vehículo de mapping móbil para acadar estradas máis seguras cun menor custe
mércores, 26 de febreiro do 2014
Esta semana déronse a
coñecer dende a Universidade de Vigo os resultados dun proxecto
tecnolóxico de gran interese. Falamos de Sitegi, e o de “gran
interese” vén a conto porque amosa un importante potencial para
pórlle freo a unha das grandes eivas do noso tecido viario: a alta
perigosidade que amosan as nosas estradas sumada ao pouco sentido
común que lles é propio a unha boa parte dos nosos condutores. O
proxecto non é novo. Naceu en 2010 cun orzamento de máis de 3,6
millóns e euros. Tres anos despois, xa podemos ver os seus primeiros
froitos e
entre eles sobresae un vehículo de mapping
móbil semellante ao que emprega para o seu servizo Street View,
pero cunhas diferenzas e particularidades a ter en conta. Por
exemplo, as aplicacións tecnolóxicas específicas de seu permiten
unha precisión centimétrica nos seus rexistros.
O proxecto vén da man
do Grupo de Xeotecnoloxías Aplicadas da UVigo en colaboración con
cinco empresas galegas dos eidos da construción e a enxeñaría. O
equipo presentado diríxese entre outras cousas a mellorar a
seguridade nas estradas e reducir de xeito considerábel os custes de
mantemento. A presentación do prototipo celebrouse este martes na
ETSE de Minas, onde se reuniron o director da escola, Benito Vázquez,
os investigadores implicados no proxecto e os representantes das
cinco empresas galegas que dende o inicio apoiaron a posta en marcha
da investigación: Insitu Ingeniería, Lógica, Extraco, Enmacosa e
Misturas.
O investigador Higinio
González fixo saber aos responsábeis de comunicación da UVigo que
“o proxecto púxose en marcha centrándose en temas de mantemento
viario, dado o escenario de escaseza de recursos económicos, onde
non é probable que inicien novas obras e onde resulta básico manter
en bo estado a actual rede de estradas”. O prototipo foi empregado
xa na rehabilitación da ponte romana de Lugo e na construción da
autovía Ourense-Celanova, entre outros lugares.
Volvendo ao vehículo
en cuestión, dicir que se trata, en palabras de Higinio González,
dunha unidade de inspección de estradas que permite realizar
inspeccións e inventarios detallados de infraestruturas facilitando
á toma de decisións ao respecto de si realizar ou non unha
rehabilitación e un mantemento na vía. Ademais, compleméntase
cunha serie de aplicacións informáticas que permiten a consulta e
interpretación da información proporcionada polos sensores
xeomáticos. O vehículo consta de recursos como un equipo de
posicionamento por satélite, escáner láser, cámaras de vídeo
para imaxes termográficas, un sistema de visión multicámara,
xeorradar e un perfilómetro láser que é quen de determinar
diferentes tecnoloxías no pavimento. Todo o que rexistran estes
sistemas pasa logo unha base de datos xeorreferenciada nun computador
que se complementa cun software de control que sincroniza tódolos
ditos elementos e que achega diagnósticos de como se atopa cada
infraestrutura avaliada.
O proxecto está
cofinanciado polo Fondo Europeo de Desenvolvemento Rexional Feder,
dentro do Programa Operativo Fondo Tecnolóxico 2007-2014, o Centro
para o Desenvolvemento Tecnolóxico Industrial, CDTI e as empresas
participantes. Entre os principais destinatarios está a
Administración Publica, “xa que se trata de equipos que permiten
tanto controlar de maneira exhaustiva a construción dunha obra nova
como o seguimento detallado de infraestruturas que xa están en
servizo”, explican os investigadores da UVigo.