A UDC xa instalou 60 medidores intelixentes de CO2 nos seus espazos

xoves, 15 de abril do 2021 S. P.

Crear espazos seguros para os escolares a través dunha medición intelixente da calidade do ar. Este é un dos grandes obxectivos do proxecto impulsado dende novembro pola Universidade da Coruña e o seu Centro de Investigación TIC (CITIC) e do que este 15 de abril tivemos ocasión de coñecer novos e interesantes detalles. Por exemplo o feito de que a Universidade da Coruña sexa pioneira a nivel estatal nunha iniciativa de Intelixencia Artificial destas características ou que xa fora quen de instalar no seu seo 60 medidores de interior (e referencias exteriores) e unha infraestrutura de rede que permite rápidas redistribucións das zonas de medición en base a campañas nos diferentes campus e edificios concretos.
O proxecto
O obxectivo é medir o dióxido de carbono (CO2) nos espazos da UDC, coa instalación de dispositivos que fagan seguimento do nivel de concentración de CO2 en diferentes dependencias universitarias como aulas ou bibliotecas, “coa finalidade de garantir espazos de estudo e traballo seguros”.
O proxecto, coordinado polo Adxunto do reitor para Tecnoloxías da Información e as Comunicacións, Carlos Escudero, catedrático da área de Teoría do Sinal e Comunicacións do departamento de Enxeñaría de Computadores, conta coa colaboración do Servizo de Informática e Comunicacións, o Servizo de Prevención de Riscos Laborais e o Centro de Investigación en Tecnoloxías da Información e a Comunicación (CITIC) a través dun proxecto COVID de GAIN (CEDCOVID, Ciencia e Enxeñaría de datos para a avaliación, predición poboacional e personalizada da evolución da enfermidade COVID-19).
Como funciona
A iniciativa inclúe a instalación de dispositivos avanzados de medición de CO2. A información proporcionada recóllese de forma centralizada para establecer patróns e poder actuar en tempo real a través de sistemas de comunicación da Internet das Cousas (IoT). Segundo explican a UDC e o CITIC, a valoración da presenza de dióxido de carbono é “clave para controlar a calidade do aire e a concentración de aerosois provocados pola COVID-19 en recintos pechados”.
En opinión dos investigadores do proxecto, e sen que haxa aínda conclusións definitivas da investigación, a medición de CO2 “é una medida que vén para quedarse”, non só polo tema relacionado co coronavirus, senón por temas de eficiencia enerxética e tamén pola influencia do dióxido de carbono no estudo “xa que con niveis altos de CO2 a atención diminúe” polo que dificulta a concentración necesaria para estudar.

PUBLICIDADE